राहुल महरालाई म्याद थपका लागि अदालत लगियो, संगठित अपराधमा अनुसन्धान हुने

१३ भदौ, काठमाडौं । विद्युतीय चुरोट (भेप)मा लुकाएर त्रिभुवन अन्तर्राष्ट्रिय विमानस्थलबाट ९ केजी सुन तस्करी भएको घटनामा अनुसन्धानका लागि पक्राउ गरिएका पूर्वसभामुख कृष्णबहादुर महाराका छोरा राहुल महरालाई अनुसन्धानका लागि म्याद लिन जिल्ला अदालत काठमाडौं पुर्याइएको छ । 

हिरासतमा राखेर अनुसन्धान गर्नुपर्ने देखिएपछि सीआईबीले राहुललाई बबरमहलस्थित अदालतमा केही अघिमात्र पेस गरेको हो । उनलाई आजै काठमाडौंबाट पक्राउ गरिएको हो । पक्राउ पर्नु केही समयअघि मात्र उनले केही ठूला मिडियालले ग्वेयवल्स शैलीमा ‘मिडिया ट्रायल’ गरेर हाममाथि हिलो छ्याप्ने कोशिस गरेको फेसबुक स्टाटस लेख्दै अनुसन्धानमा सहजीकरण गराउने तयारीमा रहेको बताएका थिए ।

गत वर्ष चिनियाँ व्यापारीले भेपमा लुकाएर तस्करी गरेको सुन विमानस्थल भन्सारबाट छुटाउन महराका बाबु छोराले सहयोग गरेको विवरण सीआईबीले फेला पारेको थियो । त्यसपछि पनि जोगिँदै आएका राहुल पक्राउ परेका छन् । उक्त सुन प्रकरणको अनुसन्धान सकेर सीआईबीले जिल्ला सरकारी वकिलको कार्यालय काठमाडौ.मा बुझाएको प्रतिवेदनमा बाबुछोराको संलग्नता रहेको देखाइएको छ । तर पद र शक्तिका आडमा जोगिँदै आएका थिए । बाबु कृष्णबहादुर भने अझै पक्राउ गर्न सकेका छैनन् ।

महरा बाबुरा छोरालाई अनुसन्धानको दायरामा नल्याएकोमा नागरिक स्तरबाटै सरकारको चर्को आलोचना हुँदै आएको छ । 

यस्तै, एमालेका नेता पूर्वगृहमन्त्री रामबहादुर थापाका छोरा प्रतीक पनि फरार छन् । उनलाई नक्कली भुटानी शरणार्थी मुद्दामा अभियुक्त बनाइएको छ । राहुल र प्रतीक दुवै जनाले बाबु शक्ति र पदमा रहँदा दुरुपयोग गरेको पाइएको छ ।