एमसीसी परियोजना स्वाधीनतामाथि हस्तक्षेप हो, स्वीकार्य छैन : विप्लव

१४ भदौ, काठमाडौं । समाजवादी मोर्चाका एक घटक नेपाल कम्युनिस्ट पार्टी (नेकपा)का महासचिव नेत्रविक्रम चन्द ‘ विप्लव’ले अमेरिकाको एमसीसी सहयोग परियोजना राष्ट्रियतामाथिको हस्तक्षेप रहेको भन्दै स्वीकार्य नहुने बताएका छन् । 

मोर्चाले आज सुर्खेतको वीरेन्द्रनगरमा आयोजना गरेको सन्देश सभालाई सम्बोधन गर्दै परियोजना स्वाधीनतामाथिको अतिक्रमण भएको भन्दै नेपाली जनताले यसको कार्यान्वयन हुनबाट रोक्ने बताए । उनले परियोजना निस्वार्थ र सदभावयुक्त सहयोग वा अनुदान नरहेको भन्दै अमेरिकाले साम्राज्यवादी सामारिक स्वार्थ पूरा गर्न आफ्नो सेना तैनाथ गराउने चेष्टासाथ एमसीसी लिएर प्रवेश गरेको बताए ।

‘स्वतन्त्र र स्वाभिमानी नेपालीसँग स्वार्थ बोकेको अमेरिकाको प्रवेशलाई रोक्नुको विकल्प छैन’ उनले भने, ‘रोकेनौं भने नेपालीमाथि देशभित्रै विदेशीले बुट बजार्नेछन् । यसमा सम्पूर्ण राजनीतिक दल गम्भीर बन्नै जरुरी छ ।’ वीर पुर्खाले कहिल्यै नेपाललाई पराधीन हुन नदिएको इतिहासलाई भविष्यसम्म कायम राख्ने थप बलियाे बनाउने कर्तव्य आमनेपालीको भएको उनको भनाइ छ ।

सभामा अन्य घटकका शीर्ष नेताहरुले सम्बोधन गर्दैछन् । बुधबारदेखि एमसीसी सम्झौता कार्यान्वयनमा आएसँगै नेकपालगायत विभिन्न दल सडक संघर्षमा उत्रिएका छन् । उनीहरुले कुनैपनि हालतमा सम्झौता कार्यान्वयन नुहन नदिने बताइरहेका छन् । 

उनले प्रधानमन्त्री प्रचण्डलाई हप्ता दिनभित्र जेल हाल्ने कुरा सुनेको बताउँदै सरकारको नेतृत्वसमेत असुरिक्षत रहेको हल्ला चलाउने देशमा नागरिकको सुरक्षा अहिलेको व्यवस्थाले गर्न नसक्ने उनको भनाइँ छ । देशमा समाजवादी व्यवस्था स्थापना गर्न सबै एकजुट हुन समेत अपिल गरे ।