सुरक्षा खतरा आएपनि भ्रष्टाचारविरुद्धको लडाइँ रोकिँदैन : प्रधानमन्त्री प्रचण्ड

१४ भदौ, काठमाडौं ।  प्रधानमन्त्री पुष्पकमल दाहाल ‘प्रचण्ड’ले सरकारले सुरु गरेको भ्रष्टाचारविरुद्धको लडाइँ नरोकिने बताएका छन् ।

सुर्खेत सदरमुकाम वीरेन्द्रनगरमा आज समाजवादी मोर्चाले आयोजना गरेको सन्देश सभालाई सम्बोधन गर्दै प्रधानमन्त्री प्रचण्डले भ्रष्टाचारविरुद्धको लडाइँ जारी रहेको र यो कुनैपनि हालतमा नरोकिने स्पष्ट पारे । उनले सरकारले लिएको कदमलाई सबै राजनीतिक दलहरुले सहयोग गर्नुपर्ने बताए । 

माओवादी केन्द्रका अध्यक्ष समेत रहेका प्रचण्डले लडाई आगामी दिनमा थप पेचिलो बन्ने र सरकारलाई सफल पार्न चाहने शक्ति थप आक्रोशित हुन सक्ने भएकाले नागरिक तहबाट आवश्यक सतर्कता अपनाउन जरुरी रहेको बताए । सबैखाले तस्करी र भ्रष्टाचारलाई निर्मूल पार्न आफूले अनुसन्धानका क्रममा आफ्नै पार्टीका नेता कार्यर्ता परेपनि नछाड्न निर्देशन दिइसकेको बताए । 

उनले अहिले आफूले राम्रो काम मात्र गर्ने, नराम्रो गर्नेलाई कानूनको दायरामा ल्याउने अभियान जारी रहेको बताउँदै यसक्रममा सुरक्षाको खतरा आएपनि आफू किंचित पछाडि नहट्ने बताए । राम्रो काग गर्दा जनताबाट सहयोग पाउनेमा आफू ढुक्क रहेको उनको भनाइ छ ।

मोर्चामा माओवादी केन्द्र, जसपा, एकीकृत समाजवादी र नेकपा सम्मिलित छन् । मोर्चाको सातै प्रदेशमा सन्देशसभा गर्ने पूर्वघोषित कार्यक्रमअनुरुप आज कर्णालीका लागि वीरेन्द्रनगरमा सभा आयोजना गरिएको हो  ।