तातोपानी नाका आजदेखि सर्वसाधारणका लागि खुल्ला

१५ भदौ, सिन्धुपाल्चोक । चीनसँगको मुख्य व्यापारिक तातोपानी नाका आजदेखि सर्वसाधारणका लागि खुल्ला गरिएको छ । विगत  साढे ८ वर्षदेखि यो उत्तरी नाका सर्वसाधारण आवतजावतका लागि बन्द रहँदै आएको थियो । भोटेकोशी गाउँपालिका–२ बाट चीन जोड्ने नाकादेखि सीमा क्षेत्र भोटेकोशीका ३० जना स्थानीयलाई चिनियाँ क्षेत्र प्रवेश गराएर मानव आवतजावत गराउँदै शुक्रबार बिहान नाकाको उद्घाटन गरिएको हो ।

अध्यागमन कार्यालय कोदारीका अनुसार चिनियाँ क्षेत्र प्रवेशका लागि अध्यागमन कार्यालय कोदारीले शुक्रबारसम्म २ सय २७ निलो रंगको पास जारी गरेको छ । जुन पास सीमाबाट ३० किलोमिटर क्षेत्रभित्रका सिन्धुपाल्चोकबासी मितेरी पुल पारीका क्षेत्रमा जान पाउने छन् । सुरुमा ३० जना र अहिले पास जारी भएका २ सय २७ नेपाली चिनियाँ क्षेत्र प्रवेश गरेका छन् ।

लामो समयपछि चिनियाँ क्षेत्र प्रवेश गर्न पाएपछि स्थानीय हर्षित देखिएका छन् । खासा व्यापारमा मात्रै निर्भर सीमाबासीलाई चिनियाँ क्षेत्र लिपिङपारी १५ वटा, रमिते र खासामा ५ वटा पसल सञ्चालन गरिएको छ । स्थानीयले ती पसलमा गएर कपडा र घरायसी सामान किन्न पाउँछन् ।

यसअघि १५ जेठ २०७६ मा आयात र गएको वैशाख १८ देखि यो नाकाबाट निर्यात खुला भएको थियो । नेपाल–चीनका अधिकारीबीच नाका सञ्चालनका लागि ल्हासा, काठमाडौं र सीमाना लिपिङमा चरणबद्ध बैठक भएका थिए । भूकम्प र बाढीपहिरोले सीमा पुग्ने कोदारी राजमार्ग जीर्ण छ । 

कोरोना महामारीले लगभग तीन वर्ष आयात पनि अनियमित बनेको थियो । सरोकारवाला सबैले तातोपानीबाट तिब्बतको कैलाशमान सरोवर जान पनि नेपाल सरकारमार्फत चीन सरकारसँग कूटनीतिक संवाद जारी राखेका छन् । प्रधानमन्त्री पुष्पकमल दाहालले असोज पहिलो सातामा गर्ने चीन भ्रमणमा यसबारे कुरा हुने विश्वास गरिएको छ ।