कोशी सरकारविरुद्धको रिटकाे पेसी संयुक्त इजलासमा

१५ भदौ, काठमाडौं । कोशी प्रदेश सरकार गठन प्रक्रियाविरुद्धको रिट निवेदन सर्वोच्च अदालतमा सुनुवाई आज संयुक्त इजलासमा हुने भएको छ । रिटको सुनुवाइ पेसी न्यायाधीशद्वय ईश्वरप्रसाद खतिवडा र सुष्मालता माथेमाको इजलासमा परेको छ । 

कोशी प्रदेश सरकारको गठन संविधान विपरीत भएको भन्दै एमाले नेता एवं पूर्वमुख्यमन्त्री हिक्मतबहादुर कार्कीले यही भदौ ६ मा सर्वोच्चमा रिट दर्ता गराएका थिए । 

चार दलको समर्थनमा कांग्रेसबाट मुख्य मन्त्री बनेका उद्वव थापाले भदौ ४ मा प्रदेशसभाबाट विश्वासको मत लिँदा सभा संचालन गरिरहेका सभाअध्यक्ष इस्राइल मन्सुरीको मतसमेत गणना गरिएपछि सरकार असंवैधानिक तवरले गठन भएको भन्दै बदरका लागि रिट दायर गरिएकाे थियाे ।

यसअघि न्यायाधीश ईश्वरप्रसाद खतिवडाको एकल इजलास उक्त रिटमा भदौ ७ मा कारण देखाउ आदेश जारी गर्दै अन्तरिम आदेश दिएको थियो । उक्त अन्तरिम आदेश रिटको अन्तिम सुनुवाइका लागि आज पेसी तोकिएको हो ।