एमसीसी परियोजनाविरुद्ध नेकपाले भण्डाफोर र ‘मार्चपास’ चलाउने

१५ भदौ, काठमाडौं । अमेरिकी सहयोग परियोजना एमसीसी सम्झौता खारेजीका लागि  नेत्रविक्रम चन्द ‘विप्लव’ नेतृत्वको नेकपाले प्रभावित क्षेत्रमा भण्डाफोर र ‘मार्चपास’ कार्यक्रम चलाउने घोषणा गरेको छ । 

आजबिहान पार्टी कार्यालयमा बसेको स्थायी समितिको बैठकले एमसीसी सम्झौता कार्यान्वयन हुन नदिन पहिलो चरणको संघर्षका कार्यक्रम घोषणा गरेको हो । जसमा सम्झौताको भण्डाफोर, गोष्ठी–अन्तरक्रिया र मार्चपास संचालन गरिने नेकपा कार्यालयले जनाएको छ । 

परियोजना संचालन हुने काठमाडौंको लप्सेफेदीबाट धादिड, नुवाकोट, मकवानपुर, तनहुँ, नवलपरासी, रुपन्देही लगायतका जिल्लामा भदौ १९ गतेदेखि २३ गतेसम्म अन्तरक्रिया र गोष्ठी हुनेछन् । ती कार्यक्रम देशभक्तहरूको संयुक्त रूपमा आयोजना गरिने र असंभव भएमा नेकपाले एकल रूपमा संचालन गर्ने भएको छ । 

त्यसपछि असोज १ देखि १५ गतेसम्म एमसीसीविरुद्ध देशभर सांस्कृतिक कार्यक्रमसहित मार्चपास अभियान सुरु हुनेछ । विभिन्न क्षेत्रमा गोष्ठी र अन्तरक्रिया संचालनका लागि नेतृत्व तोकिएको छ । कार्यक्रमका लागि पोष्टरसमेत सार्वजनिक गरिएको छ । परियोजनालाई नेकपाले राष्ट्रघातीको संज्ञा दिँदै विरोध गर्दै आइरहेको छ ।

पाँच वर्ष सक्नुपर्ने परियोजना सरकारले यही बुधबारबाट एमसीसीका प्रतिनिधिको उपस्थितिमा कार्यान्वयन सुरु गरेको घोषणा गरिसकेको छ ।