एकीकृत समाजवादीका सांसद चौधरी बैंकको कालोसूचीमा

१५ भदौ, दाङ । नेकपा एकीकृत समाजवादीका नेता, प्रतिनिधिसभा सदस्य तथा पूर्व मन्त्री मेटमनी चौधरी बैंकको कालोसूचीमा परेका छन् । एक व्यक्तिलाई दिएको एभरेष्ट बैंकको पाँच लाख रूपैँयाको चेक नसाटिएपछि उनी कालोसूचीमा परेका हुन् । गएको साउन १५ मा कालोसूचीमा परेका एकीकृत समाजवादीका नेता चौधरीको अझै फुकुवा नभएको स्रोतले बताएको छ ।

रिक्वेष्ट आईडी २८२४ ले उजुरी हालेपछि चौधरीलाई कर्जा सूचना केन्द्रले कालोसूचीमा राखेको हो । कालोसूचीमा परेसँगै सबै बैंकमा रहेका उनको सबै खाता रोक्का गरिएको छ । खाता रोक्कासँगै ती बैंक खाताबाट पैसा झिक्न मिल्दैन । पैसा जम्मा गर्न भने मिल्छ ।

यस बारेमा सांसद चौधरीसँग सम्पर्क गर्दा उनले कुरा मिलिसकेको तर कालोसूची फुकुवा भने नभइसकेको बताए । आफू मन्त्री बन्नु भन्दा अगाडि केटाहरूले केही खर्च भएको भन्दै रकम मागेपछि चेक काटिदिएको तर पैसा नभएर बाउन्स भएको जानकारी दिँदै सम्भवतः आइतबार फुकुवाको निवेदन दिने जानकारी दिए ।

कहिले काँही वेवास्ता गर्दा समस्यामा परिने उनले बताए ।  । जुन व्यक्तिले उजुरी दिएपछि कालोसूचीमा राखिएको थियो, त्यही व्यक्तिले फुकुवाको लागि निवेदन दिएमा मात्रै कालोसूचीबाट फुकुवा हुन्छ ।