भक्तपुर बालसुधार गृहबाट फरार कैदीमध्ये २ जना अझै पक्राउ परेनन्

१५ भदौ, काठमाडौं । भक्तपुर सानोठिमीमा रहेको बालसुधार गृह तोडफोड गरेर भागेका २ जना नाबालक कैदीबन्दी अझै फरार छन् । यही भदौ ३ गते सुधारगृह तोडफोड गरी २५५ जनामध्ये अन्यलाई साेही दिन ललितपुर, काठमाडौंका विभिन्न स्थानबाट पक्राउ परेपनि १७ वर्षीय रञ्जित राई र महम्जम हवारी भने अझै पक्राउ परेका छैनन् । 

भदौ ११ गतेसम्म ५ जना फरार रहेकामा ३ जना सम्पर्कमा आइसकेको र हवारी र राई खोजी भइरहेको जिल्ला प्रहरी परिसर भक्तपुरका डिएसपी बसन्त पाठकले जानकारी दिएका छन् ।

पुनः पक्राउ गरी ल्याइएकामध्ये १८ वर्ष कटेका ५७ जनालाई काठमाडौं बाहिरका सुधार गृह पठाइसकिएको छ । सुधार गृहमा कैद भुक्तान गरिरहेका रामेछापका कमल बस्नेतको मृत्यु भएपछि आफन्तले गरेको विरोध प्रदर्शनका क्रममा प्रहरीसँग झडप हुँदा उनीहरु मूल ढोका फोडेर भागेका थिए ।