काेशी सरकारविरुद्धको रिट न्यायाधीश खतिवडाले नहेर्ने भएपछि सुनवाइ सर्याे

१५ भदौ, काठमाडौं । कोशी प्रदेशका मुख्यमन्त्री उद्धव थापाविरुद्ध सर्वोच्च अदालतमा परेको रिट निवेदनको अन्तिम सुनुवाइ आज नहुने भएको छ । सुनुवाइका लागि शुक्रबार न्यायाधीश ईश्वरप्रसाद खतिवडा र सुष्मालता माथेमाको इजलासमा पेसी परेको थियो ।

भदौ ६ भा दायर रिटमा भोलिपल्ट ७ गते न्यायाधीश खतिवडाको एकल इजलासले प्रारम्भिक सुनुवाई गर्दै कोशी सरकारलाई  दीर्घकालीन असर पुर्याउने किसिमका नीतिगत कुनै निर्णय नगर्न आदेश दिँदै अन्तिम फैसलाका लागि आजलाई पेसी तोक्न आदेश दिएको थियो । 

तर अन्तिम सुनुवाइका लागि आज खतिवडा समेतको संयुक्त इजलासमा पेसी परेपछि उनले सुनवाइमा नबस्ने बताएका हुन् । सुनुवाई अर्को दिनका लागि सारिएको छ ।

मुख्यमन्त्री थापाले यही भदौ ४ मा प्रदेशसभाबाट विश्वासको मत लिने क्रममा सभाध्यक्ष समेत मत गणना गरिएपछि एमालेका नेता एवं पूर्वमुख्यमन्त्री हिक्मतकुमार कार्कीले विश्वासको मत बदरको माग गर्दै सर्वोच्च अदालतमा रिट दायर गराएका थिए ।

थापा नेतृत्वको सरकार भंग गरी संविधानको धारा १६८ को उपधारा ३ बमोजिम प्रदेशसभाको सबैभन्दा ठूलो दल एमालेको नेतृत्वमा सरकार गठन गर्ने परमादेश माग रिटमा गरिएको छ ।