तातोपानी नाकामा तत्काल सिन्धुपाल्चोकका बासिन्दालाई मात्र आउजाउ अनुमति

१५ भदौ, काठमाडौं । संघीय राजधानी काठमाडौंबाट नजिकको एकमात्र चीनसँगको सिन्धुपाल्चोकको तातापानी नाकामा आजदेखि सर्वसाधारणका लागि आउजाउ खुला गरेपनि सबै नेपालीले आउजाउ गर्न नपाइने भएका छन् । 

तत्कालका लागि सिन्धुपाल्चोकबासीलाई मात्र चिनियाँ भूभागमा जान पाउने व्यवस्था भएको सांसद माधव सापकोटाले जानकारी दिएका छन् । सापकोटा सिन्धुपाल्चोक–१ बाट निर्वाचित सांसद हुन् । उनीसहितको टोलीलाई आज बिहान चिनियाँ पक्षले सीमा क्षेत्रको सीमा मितेर पुलमा स्वागत गरेको थियो । 

अहिलेका लागि सिन्धुपाल्चोकका बासिन्दालाई मात्र आउजाउका खुला गरिएको उनले बताए । उनीहरुका लागि नागरिकता अनिवार्य गरिएको छ र नागरिकता देखाएपछि चिनियाँ पक्षले एक वर्षे अवधिको पास दिने र सो आधारमा पारि जान र किनमेल गर्न दिइनेछ ।

२०७२ बैशाख १२ को विनाशकारी भूकम्पपछि तीन महिना अघि मालवाहक सवारीसाधनलाई खुला गरिएपनि मानिस (पैदलयात्रु)लाई भने बल्ल आजबाट खुला गरिएको हो । अन्य जिल्लाका नागरिकलाई भने यसपछि दुई पक्षबीच छलफल गरेर मात्र दिइने बताइएको छ ।