बालुवाटार जग्गा प्रकरणमा सीआईबीले माधव नेपाललाई निर्दोष सावित गरिसकेको छः प्रधानमन्त्री

१५ भदौ, पोखरा । प्रधानमन्त्री पुष्पकमल दाहाल प्रचण्डले बालुवाटारको ललितानिवास जग्गा प्रकरणामा पूर्वप्रधानमन्त्रीसमेत रहेका नेकपा एकीकृत समाजवादीका अध्यक्ष माधवकुमार नेपाल सफाइ पाइसकेको बताएका छन् । उनले नेपाल प्रहरीको केन्द्रीय अनुसन्धान ब्यूरो (सीआइबी) ले निर्दोष सावित गरेको बताएका छन् । समाजवादी मोर्चाले पोखरामा आयोजना गरेको सन्देश सभामा प्रचण्डले माधव नेपाल  निर्दोष सावित भइसकेको बताए ।

सीआईबीले बयान लिएर मुद्दा चलाउन नपर्ने भन्दै लिखित दिएकाले नेपाल निर्दोष सावित भएको प्रचण्डको भनाइ छ । सीआईबीले के हो भनेर नेपालसँग बुझेर बयान लिएर मुद्दा चलाउन नपर्ने भनेर लिखित दिएपछि बालुवाटर जग्गा प्रकरणमा उनको कुनै मुद्दा नरहेको प्रचण्डले बताए । भू–माफियाको जगजगी बढी हुँदा ललिता निवासको फाइल खोलिएको उनले बताउँदै उनले सुन तस्करी सामान्य नरहेको भन्दै यसमा धेरैथरीका मान्छेको संलग्नता रहेको उल्लेख गरे ।

प्रधानमन्त्री प्रचण्डले क्वीन्टलका क्वीन्टल सुन तस्करी हुने गरेको कुरा थाहा पाएपछि सरकारले अनुसन्धान सुरु गरेको बताए । सुन तस्करीमा धेरै खालका मान्छेहरुको सेटिङ छ । सेटिङ नभइकन त्यसरी सुन तस्करी हुने कुरा असम्भव हो’ प्रधानमन्त्री प्रचण्डले भने । ठूलो मात्रामा सुन तस्करी हुने गरेको थाहा पाएपछि त्यसमाथि अंकुश नलगाइ देशका अर्थतन्त्र सन्तुलित ढंगले अगाडि बढाउन नसकिने निष्कर्षसहित सरकारले त्यसमाथि कारवाही सुरु गरेको बताए । 

सरकारमा सुशासनतर्फ राम्रो काम भएको भन्दै प्रधानमन्त्री प्रचण्डले सत्ता गठबन्धन पनि यसतर्फ सकारात्मक रहेको बताए । उनले आफ्नो नेतृत्वमा सरकार बन्दा खस्कँदो अर्थतन्त्रलाई उकास्न मौद्रिक र वितीय नीतिमार्फत संकटलाई समाधान गर्नतर्फ केन्द्रित रहेको बताए । अर्थतन्त्रमा सुधार आए पनि अझै केही समस्या बाँकी रहेको उनको भनाइ थियो ।

आफ्नो भनाइको धेरै समय माधव नेपालको बचाउमा खर्चिएका प्रधानमन्त्री प्रचण्डले कम्युनिस्टहरू एक ठाउँमा हुन जरूरी रहेको बताए । उनले समाजवादी मोर्चालाई मोर्चामै सीमित नराखी सबै कम्युनिस्टलाई जोडेर जाने सपना रहेको बताए । ’हाम्रो सपना समाजवादी मोर्चासँग मात्र सीमित रहँदैन, सबै कम्युनिस्ट जोडेर जान्छौं, राष्ट्रवादी, देशभक्त र समाजवादतर्फ आस्था राख्नेलाई जोडेर एउटै कम्युनिस्ट पार्टी बनाउने उद्देश्य राखेका छौं, आगामी दिनमा देशको नेतृत्व कम्युनिस्टले नै गर्नेगरी जानेछौं, उनले भने । 

एकता, संघर्ष र रूपान्तरण नै समाजवाद भएको भन्दै उनले कम्युनिस्ट एक ठाउँमा केन्द्रित हुन जरूरी रहेकोमा जोड दिए । मोर्चा विगतको जस्तो कमजोर नरहेको दाबी गर्दै उनले समाजवादी मोर्चा लामो समयसम्म चल्ने गरी बनाइएको बताए । हतारमा पार्टी एकता हुँदा दुर्घटनामा पुगिएको उल्लेख गर्दै उनले मोर्चा तत्काल पार्टी एकता गर्ने पक्षमा नरहेको पनि बताए ।