जुम्लामा जीप दुर्घटना : चालक र सहचालकको घटनास्थलमै मृत्यु

७ भदौ, काठमाडौं । जुम्लामा भएको जीप दुर्घटनामा चालक र सहचालकको मृत्यु भएको छ। जुम्लाबाट बिहान करिब सवा ७ बजे मुगुका लागि छुटेको भे १ ज १०९९ नम्बरको जीप जुम्लाको कनकासुन्दरी गाउँपालिका–४ स्थित छलपुनेरानजिक आज बिहान दुर्घटना भएको थियो । 

मृतक दुवै जनाको पहिचान खुल्न नसकेको डीएसपी प्रल्हाद कार्कीले जानकारी दिएका छन् । जीप सडकबाट अन्दाजी ३ सय ५० मिटर तल खसेको थियो । जीपमा दुई जना मात्र सवार रहेको पाइएको प्रहरीको भनाइ छ । मृतक दुवै जनाकाे परिचय खुल्न बाँकी रहेकाे जनाइएकाे छ ।

यस्तै, आजै बिहान ७ बजेतिर काठमाडौंको पेप्सीकोलामा बस र जीप ठोक्किएर बस पल्टिएर मोटरसाइकल र स्कुटर कुल्चिँदा मोटरसाइकलमा सवार राज भट्टराईको उपचारका क्रममा मृत्यु भएको छ । स्कुटरमा सवार २ महिला र मोटरसाइकलमा चालकसहित जीपका गरी १३ जना घाइतेको अस्पतालमा उपचार भइरहेको छ ।