बर्दिया कारागारबाट कैदी फरार

१७ भदौ, बर्दिया । बर्दिया कारागारमा कैद सजाय काटिरहेका एक कैदी आज बिहान कारागारबाट फरार भएका छन् । कर्तव्य ज्यान मुद्दामा जिल्ला अदालत बर्दियाबाट सजाए पाएर विगत एक बर्ष देखि कैद भुक्तान गरिरहेका ठाकुरबाबा नगरपालिका –८ का २७ बर्षीय अजित बुढा क्षेत्री बर्दिया कारागारबाट भागेका हुन् । 

उनी आइतबार बिहान करिब ३ बजे कारागारको ट्रस्ट माथि रहेको पर्खालबाट हाम फालेर फरार भएको बर्दिया कारागारका प्रमुख सन्तोष वि.क.ले बताए । उनका अनुसार बुढा क्षेत्रीले गत एक वर्षदेखि बर्दिया कारागारमा कैद भुक्तान गरिरहेका थिए । 

अनुसन्धानको क्रममा बुढा क्षेत्री कट्टु मात्र लगाएको अवस्थामा भागेको जिल्ला प्रहरी कार्यालयले जनाएको छ । जिल्ला प्रहरी कार्यालयका प्रहरी उपरीक्षक सुधिरराज शाहीले बुढा क्षेत्री फरार भएको थाहा पाउन साथ नेपाल प्रहरी र सशस्त्र प्रहरीको टोली परिचालन गरेर खोजी कार्य भैरहेको जानकारी दिए । 

उनले भने, ‘भारतीय नाका सिल गरी भारतीय प्रहरी र भारतीय सिमा सुरक्षा बल सँग समन्वय गरी हुलिया समेत पठाइएको छ । बर्दिया जिल्लाका छिमेकी जिल्लाहरूमा समेत हुलिया पठाएर खोजीकार्य गरिरहेका छौं ।’

२०७१ सालमा ठाकुरबाबा नगरपालिका ८ कै जोरासिंह थापाको हत्याको अभियोगमा बुढा क्षेत्री पक्राउ परेका थिए । अदालतमा बयान दिन जाँने क्रममै फरार भएका उनलाई प्रहरीले गत बर्ष मात्र पक्राउ गरेको थियो । क्षेत्रीलाई  अदालतले कर्तव्य ज्यान मुद्दा र फरार अभियोगमा ३० बर्षको कैद सजायको फैसला सुनाएको थियो ।