कुमारी र सिद्धार्थ बैंकको पौने ७ लाख बढी कित्ता शेयर बिक्रीमा

१७ भदौ, काठमाडौं । दुई वाणिज्य बैंकको पौने ७ लाख बढी कित्ता शेयर बिक्रीमा राखिएको छ। कुमारी बैंक र सिद्धार्थ बैंकको संस्थापक समूहको ६ लाख ७९ हजार ७९५ कित्ता शेयर बिक्रीमा राखिएको हो।

जसमा कुमारी बैंकको ३ लाख ७९ हजार ७९५ कित्ता र सिद्धार्थ बैंकको ३ लाख कित्ता संस्थापक शेयर छन्। हाललाई यी दुवै बैंकको शेयरमा विद्यमान संस्थापक शेयरधनीहरुले मात्रै खरिद आवेदन दिन पाउनेछन्।

दुवै बैंकका संस्थापक सेयरधनीहरुलाई शेयर खरिदका लागि ३५ दिनको समयावधि दिइएको छ। कुमारी बैंकको सेयर खरिदका लागि काठमाण्डौको नक्सालस्थित कुमारी क्यापिटल र टंगालस्थित कुमारी बैंकको प्रधान कार्यालयमा खरिद आवेदन दिन सकिनेछ।

सिद्धार्थ बैंकको शेयर खरिदका लागि भने काठमाण्डौको हात्तीसारस्थित केन्द्रीय कार्यालयमा आवेदन दिन सकिनेछ। तोकिएको म्यादभित्र संस्थापक शेयरधनीहरुबाट खरिद आवेदन नपरेको खण्डमा अन्य व्यक्ति तथा संस्थालाई बिक्री खुला गरिने दुवै बैंकले जनाएका छन्।