पार्टीले गर्नेभन्दा फरक ढंगले दुई महिनाभित्र १६५ वटै क्षेत्रमा पुगेर रिपोर्ट तयार गछौं : रुपान्तरण अभियान

१७ भदौ, काठमाडौ । नेपाली कांग्रेसको तेस्रो पुस्ताका नेताहरूले चलाएको रुपान्तरण अभियानले १६५ वटै निर्वाचन क्षेत्रमा पुगेर पार्टीले सुधार गर्नुपर्ने विषयहरू तयार गर्ने भएको छ । अभियानका नेताहरूले पार्टीले गर्ने कार्यक्रमहरू भन्दा आफूहरूको अभियान फरक भएको बताएका छन् । पार्टी निर्देशित नभएकाले पार्टीले गर्नुपर्ने सुधारका विषयहरू प्रतिवेदनका रुपमा तयार गर्ने उनीहरूको भनाइ छ । 

नेपाल बहससँग कुरा गर्दै अभियानका नेता गुरु घिमिरेले रुपान्तरण अभियान पार्टीले गरिरहेका र गर्ने कार्यक्रमभन्दा फरक रहेको बताए । उनले पार्टीले गर्ने कार्यक्रममा कांग्रेसका र सरकारका विषयहरू पनि समावेश हुने तर, अभियानले पार्टीको सुधारका लागि के के कुराहरू गर्नुपर्छ भनेर तलो तहबाटै  सुझाव लिने बताए । पार्टीले गरेका कार्यक्रमसँग रुपान्तरण अभियानलाई जोड्न नमिल्ने उनको भनाइ छ । 

उनले भने, ‘नेपाली कांग्रेसभित्र धेरै कुरामा विचलन आएको छ । नेतृत्व तहमै सुधार गर्नुपर्ने छ । महाधिवेशन भएको यतिका समय सम्म विभाग बनेका छैनन् ।  पार्टीलाई विधान सम्बत रुपमा चलाउने कुरा पनि भएको छैन । भातृसंगठनहरुको अवस्था नाजुक छ । महाधिवेशन गराउन नेतृत्वले सकेको छैन । महाधिवेशन नभएसम्म भातृसंस्थाहरु चल्न सक्दैनन् । यिनै कुराहरूलाई सुधार गर्न पनि नेतृत्व तयार देखिएको छैन । अरू पार्टीका थुप्रै पक्षमा सुधार गर्नुपर्ने छ ।’
  
शनिबार बसेको अभियानमा संलग्न नेताहरूको बैठकले १६५ वटै क्षेत्रमा रुपान्तरण अभियान संचालन गर्ने निर्णय गरेको हो । कांग्रेसमा सभापति शेरबहादुर देउवासहित १४ औँ महाधिवेशनबाट निर्वाचित भएको नेतृत्वले विधान अनुसारका काम र राष्ट्रको नेतृत्व गरेर जनतामा आशा जगाउन नसकेको घिमिरेले बताए । 

अभियानले यसअघि सातवटै प्रदेशमा पुगेर अभियान संचालन गर्ने र पार्टी सुधारका लागि ग्राउन्डको सन्देश संकलन गर्ने काम गरेको थियो । रुपान्तरण अभियानकै दवाबमा कांग्रेसले यसअघि १० दिने आन्तरिक विशेष अभियान संचालन गरेको थियो । साउन पहिलो साता बसेको कांग्रेस बैठकले १० भदौदेखि पुनः अर्को अभियान संचालन गर्ने निर्णय गरेको थियो । तर केही दिन अघि मात्रै सभापति देउवाले बैठक राखेर सो अभियान स्थगित गर्ने निर्णय गराएका थिए ।

पार्टीले अभियान स्थगित गरे लगत्तै रुपान्तरण अभियानका नेताहरूले देश व्यापी अभियान संचालन गर्ने निर्णय गरेको छ । नेता घिमिरेले पार्टीमा देखिएका बेथिति र विसंगति तथा पछिल्लो समय सरकारले गरिरहेका अन्याय पूर्ण कार्य विरुद्ध भण्डाफोर गर्दै देश व्यापी अभियान संचालन हुने बताए । ’सरकारले भ्रष्टाचारको फाइल खोलिरहेको छ । तर दोषी सबै समातिएका छैनन् । सरकारले चाहेका मान्छेलाई जोगाउने र अरूलाई फसाउने गरी काम भइरहेको छ,’ उनले भने ।

उनले अभियानमार्फत देश भरि पुगेर भ्रष्टाचारका सबै फाइल खोल्न जनदबाब सिर्जना गर्ने बताए । त्यस्तै, पार्टीलाई विधिसम्मत् चलाउन र संगठनलाई मजबुत बनाउन नेतृत्वलाई दबाब बनाउने अभियानको रणनीति छ । यसपटक भदौ २४ गते वीपी जयन्तीका दिन काभ्रे क्षेत्र नं. २ बाट अभियानको प्रारम्भ गरिने नेता केसीले बताए । दुई महिनासम्म देश दौडाहापछि अभियान कार्तिक २४ गते समापन हुनेछ ।