बँदेल मारेर खाने नीति ल्याएर पीडित किसानलाई राहत दिन सकिन्छ  ः आरजु राणा

१७ भदौ, काठमाडौं । संघीय सांसद एवं संसदको कृषि, सहकारी तथा प्राकृतिक स्रोत समिति सभापति आरजु राणाले किसानको खेतबारी नष्ट पार्ने वन्यजन्तु बँदेल मार्ने नीति ल्याउनुपर्ने बताएकी छन् । 

सिंहदरबारमा आइतबार बसेको समितिको बैठकमा उनले किसानहरू आफूले लगाएको खेतबारी बँदेल र बाँदरबाट जोगाउन मुस्किल भई विस्थापनको अवस्थामा पुगेको भन्दै बँदेल मार्ने र बाँदरलाई परिवार नियोजन विधि लागू गरेर जान सकिने बताइन् । बाँदरको संख्या घटाउन बच्चा नपाउने विधि (परिवार नियोजन)काे प्रयाेग पनि विकल्प हुनसक्ने बताइन् । 

जंगली जनावर बाँदर, बँदेल र दुम्सीले अन्नबालीमा नष्ट गरेर किसान थातथलो छाड्न बाध्य भएको र यसका रोकथामका लागि सरकारले नीति तत्काल ल्याउनुपर्ने भन्दै संसद बैठकमा लगातार आवाज उठाउँदै आएका छन् । यी जंगली जनावरले पहाडी क्षेत्रका करिब ९० प्रतिशत जिल्लाका किसान विगत दशकदेखि पीडित छन् । 

नागरिकको जीवन धान्ने बाली नै नष्ट गर्ने क्रम नरोकिँदा क्षति पुर्याउनेलाई तह लगाउन कडा नीति ल्याउनुपर्नेमा सभापति राणाले जोड दिइन् । मानिस र जंगली जनावरबीचको द्वन्द्वले मानिसको बाली मात्र नभई ज्यान समेत गइरहेको तर्फ सरकारको ध्यानाकर्षण गराइन् । 

जनावरको संरक्षण आवश्यक छ, तर मान्छेले लगाएको बाली मान्छेले नै खान नपाउनेगरी संरक्षण गरेर के फाइदा ?’ उनले भनिन्, ‘बँदेल त खान्छ नि, बाँदर पो खाँदैन त । बाँदरलाई  फ्यामेली प्लानिङबाट संख्या घटाउन सकिने रहेछ ।’ उनले भारतको हिमाञ्चल प्रदेशमा फ्यामेली प्लानिङ (बच्चा नजन्मने) विधि प्रयोग गर्ने गरिएको दृष्टान्त सुनाउँदै उक्त विधिबाट २ वर्षमै बाँदर आतंक मेटाउन सकिने बताइन् ।

खान मिल्ने जनावरको संख्या बढ्न नदिने उपायको रुपमा उनले मारेर खाने नीति ल्याउनुपर्ने बताइन् । यसका निम्ति वन्यजन्तु विभाग लगायत सम्बन्धित निकायहरूसँग  छलफल गर्नुपर्ने बताइन् । अष्ट्रेलीयामा खरायो र श्रीलंकामा बाँदर नियन्त्रण गरेको शैलीमा नेपालमा पनि बाँदर बँदेल नियन्त्रण गर्नुपर्नेमा जोड दिए ।

बैठकमा समिति सदस्य एवं सांसदहरुले अष्ट्रेलीयामा खरायो र श्रीलंकामा बाँदर नियन्त्रण गरेको तरिका नेपालमा लागू गर्ने नीति ल्याउनुपर्ने धारणा राखे ।