थुनामा रहेका पाकिस्तानी नागरिक अब्दुल हईलाई स्वदेश पठाउन सर्वोच्चको आदेश

१७ भदौ, काठमाडौं । सर्वोच्च अदालतले विगत चार वर्षदेखि कारागार थुनामा रहेका पाकिस्तानी नागरिक मोजाम अब्दुल हईलाई थुनामुक्त गरी स्वदेश फिर्ता पठाउन आदेश दिएको छ । 

न्यायाधीशद्वय सुष्मालता माथेमा र डा. मनोजकुमार शर्माको संयुक्त इजलासले हईलाई रिहा गरी आफ्नै देश फिर्ता गराउन गर्न अध्यागमन विभागलाई जिम्मा लगाउन आदेश दिएको हो ।

भिसा नियमित नगरी नेपालमा बसेको पाइएपछि अध्यागमन विभागले ७ लाख ८१ हजार तीन सय ८९ दशमलव १२ रुपैयाँ भिसा र विलम्ब शुल्क रु ५० हजार जरिवाना गर्ने निर्णय गरेको थियो । उक्त रकम तिर्न नसकेपछि उनलाई सन् २०१९ को अक्टोबर ७ तारेखदेखि जल पठाएको थियो ।

थुनामुक्तका लागि परेको मुद्दामा गत शुक्रबार आदेश दिँदै विभागको निर्णयमा न्यायिक मूल्य र मान्यताको पालना नभएको उल्लेख गरिएको छ ।