किन नेपाल आएका थिए अमेरिकी सिनेटर होलेन ?

१७ भदौ, काठमाडौं । तीन दिन अघि नेपाल भ्रमणमा आएका सयुक्त राज्य अमेरिकी सिनेटको परराष्ट्रसम्बन्ध समिति र राज्य तथा वैदेशिक कार्य–सञ्चालनसम्बन्धी विनियोजन उपसमिति सदस्य सिनेटर क्रिस भान होलेन तीन दिने नेपाल बसाई सकेर आज फर्कदैछन् । उनले नेपालका विभिन्न उच्च पदस्थसहित नेकपा एमाले अध्यक्ष ओली र प्रतिनिधिसभाका सभामुख देवराज घिमिरेसँग सँग पनि आज छलफल गरेका छन् । 

उनले एमाले अध्यक्ष ओलीसँग नेपालको शान्ति प्रक्रिया कहिले टुंगोमा पुग्छ भनेर ओलीलाई प्रश्न गरेका थिए । शान्ति सम्झौता भएको १७ वर्ष बितिसक्दा पनि शान्ति प्रक्रिया टुंगोमा नपुग्नुको कारण उनले ओलीसँग खोजेका थिए । नेपालमा अमेरिकी योजना एमसीसी कार्यान्वयनमा गएपछि नेपाल आइपुगेका हुन् । मुलत नेपालमा अमेरिकी लगानीमा रहेका योजनाहरुकाे अवस्था बुझ्न आएका उनले धेरैवटा गैरसरकारी संस्थाका प्रतिनिधिहरूलाई पनि भेटेका छन् । 
   
अमेरिका फर्कनुअघि उनले एमाले अध्यक्ष ओलीसँग भेट गरी शान्ति प्रक्रियाको बाँकी कामबारे चासो राखेका हुन् । सिंहदरबारस्थित एमाले संसदीय दलको कार्यालयमा आइतबार अपरान्ह भएको भेटमा अमेरिकी सिनेटर होलेनले शान्ति प्रक्रियाका बाँकी काम कसरी अघि बढ्छ भनेर सोधेको एमाले संसदीय दलका उपनेता सुवास नेम्वाङले जानकारी दिएका छन् । 

नेम्वाङका अनुसार नेपालको प्रक्रिया कसरी के हुन्छ भन्ने विषयमा जिज्ञासा रहेको थियो । दुई देशबीचमा रहेको सम्बन्ध अझै समुधुर हुँदै गएकोमा उनी आशावादी देखिएका थिए । जवाफमा ओलीले शान्ति प्रक्रियालाई आफू नेतृत्वको सरकार हुदाँ नै टुंगोमा पुर्याउने कोसिस र यो अन्तर्राष्ट्रिय प्रतिबद्धता, सर्वोच्च अदालत र विस्तृत शान्ति सम्झौता अनुसार पीडितमैत्री हुने गरी टुंगोमा पुर्याइने बताएका थिए । 

अमेरिकी सहयोग मिलेनियम च्यालेन्ज को अपरेसन (एमसीसी)सँग भएको सम्झौता कार्यान्वयन सुरु भएकोमा अमेरिकी सिनेटर होलेनले खुसी व्यक्त गरेका थिए । होलेन गत शुक्रबार नेपाल आएका हुन् । उनले केही सरकारी अधिकारीहरू, नागरिक समाज, उद्योगी, दूतावासका कर्मचारीहरू नेपालको अवस्थाबारे कुराकानी गरेका थिए । 

भ्रमणका क्रममा उनले नेपाल र अमेरिका बीचको राजनीतिक र व्यावसायिक सम्बन्धलाई थप मजबुत बनाउन सरकारी अधिकारी, गैरसरकारी संस्थाका प्रतिनिधि, युवा, सांसद र उद्यमी, दूतावासका कर्मचारी लगायतसँग भेटवार्ता र बैठक गरेको जनाएका छन् । सिनेटर होलेनले नेपालमा सञ्चालित स्वास्थ्य, विद्युत, यातायात, पूर्वाधारलगायत अमेरिकी परियोजनाबारे अमेरिका पुगेर रिपोर्ट गर्नेछन् । 

उनले आज बौद्धनाथ स्तुपाको अवलोकनपछि सञ्चारकर्मीसँगको अन्तरक्रियामा द्विपक्षीय सम्बन्धलाई थप बलियो बनाउनु आफ्नो भ्रमणको उद्देश्य रहेको बताए । सिनेटर होलेनले नेपाल र अमेरिका बीचको कूटनीतिक सम्बन्धको ७६ औँ वर्षका अवसरमा दुई देशबीचको सम्बन्ध थप वृहत् र सुमधुर बनाउने उद्देश्यले नेपाल भ्रमण गरेको बताए । 

यसअघि सन् १९८० मा आफूले नेपालको भ्रमण गरेको भन्दै उनले त्यस अवधिमा नेपालमा धेरै परिवर्तन र उपलब्धि भएको आफूले पाएको सुनाए । सिनेटर होलेनले अमेरिका र नेपाल बीचको राजनीतिक, आर्थिक र व्यावसायिक सम्बन्धलाई थप मजबुत बनाउन विभिन्न व्यक्तित्वसँग भेटवार्ता गरेको र सबै भेट फलदायी भएको बताए ।