विद्यालयबाट घर फर्किने क्रममा बाढीमा परेर दाजु–बहिनीको मृत्यु

१८ भदौ, काठमाडौं । रूकुम पश्चिमको चौरजहारी नगरपालिका–६ घर्तिकाँडाकामा विद्यालयबाट घर फर्किंदै गरेका एकै घरका दुई बालबालिकाको बाढीमा परेर ज्यान गएको छ । 

स्थानीय रतन बुढाथोकीका १० वर्षीय छोरा मनोज र ६ वर्षीया छोरी भावनालाई आइतबार साँझ स्थानीय म्याउला खोलामा आएको खहरेले बगाएको थियो । दिउँसो बगाइएका उनीहरुको शव राति १० बजेतिर घटनास्थलभन्दा केही तल फेला परेको जिल्ला प्रहरी कार्यालय रुकुमपश्चिमका प्रहरी प्रमुख डीएसपी नवराज भट्टराईले जानकारी दिएका छन् । 

दाजु मनोज कक्षा ३ र बहिनी भावना कक्षा १ मा अध्ययनरत थिए । उनीहरु घरदेखि करिब २ किलोमिटर टाढा रहेको विद्यालयमा अध्ययनरत थिए ।

अरुबेला पानी नहुने खहरे खोलामा बाढी आएको बेला सामान्य ठानेर दाजु बहिनीले तर्न खोज्दा घटना भएको हुनसक्ने प्रहरीको अनुमान छ । दुवै छोराछोरीको बाढीमा परेर मृत्यु भएएपछि बुढाथोकी परिवार शोकमा डुबेको छ ।