ताप्लेजुङ-काठमाडौं हवाई भाडा घट्यो

१८ भदौ, काठमाडौं । नेपाल एयरलाइन्सले करिब तीन महिनापछि काठमाडौं–सुकेटार उडान सुचारु गरेको छ । मौसम प्रतिकूल कारण देखाउँदै गत जेठ २४ गतेदेखि ताप्लेजुङकोको सुकेटारमा उडान हुन सकेको थिएन ।

मौसममा सुधार आएसँगै आजदेखि नियमित उडान सुरु भएको नेपाल एयरलाइन्सका सुकेटार विमानस्थल प्रमुख सचिन तिवारीले जानकारी दिएका छन् । 

सोमबार काठमडौंबाट ६ यात्रु आएको र काठमाडौंतर्फ १ जना यात्रु उडेको उनले बताए । पहिलेकै उडान तालिकाअनुसार साताको सोमबार, बिहीबार र शनिबार नियमित उडान हुनेछ । करिब एक हजार आठ सय मिटरको उचाइमा रहेको सुकेटार विमानस्थलमा बर्खाको समयमा प्रायः हुस्सु लाग्ने भएकाले नियमित उडानमा समस्या पर्दै आएको छ । 

यसअघि काठमाडौं–सुकेटारको भाडा ९ हजार ६५३ लाई घटाएर ८ हजार ६०० मा झारिएको छ । मौसममा सुधार र चाडबाड नजिक आएका कारण यात्रु अभाव नहुने र उडान नियमित हुने विश्वासको स्थानीयले गरेका छन् । यहाँ सरकार स्वामित्वको नेपाल एयरलायन्सले मात्र उडान गर्दै आइरहेको छ ।