प्रतिनिधिसभामा ‘केही नेपाल ऐन संशोधन गर्न बनेको विधेयक २०८०’ निर्णायार्थ पेस

१८ भदौ, काठमाडौं । ‘केही नेपाल ऐन संशोधन गर्न बनेको  विधेयक २०८०’ प्रतिनिधिसभाको आज बसेको बैठकमा निर्णायर्थ पेस भएको छ । यसअघिको बैठकमा सांसदहरुको गणपूरक संख्या नपुगेका कारण रोकिएको विधेयक आजको बैठकमा पेस भएको हो । 

आजको बैठकमा प्रतिनिधिसभामा हाल कायम रहेका सदस्य संख्यामध्ये ८३ जना उपस्थित थिए । गणपूरक संख्यामा ६९ सदस्य अनिवार्य उपस्थित हुनुपर्ने नियम छ । प्रमुख प्रतिपक्ष नेकपा (एमाले)का सचेतक महेश बस्नेतले गणपूरक संख्या रहे नरहेको यकिन गर्न माग गरेपछि सभामुख देवराज घिमिरेले ३ मिनेट घण्टी बजाएर संख्या यकिन गर्दा ८३ जना उपस्थित रहेको पाइएकाे थियाे ।

त्यसपछि सभामुख घिमिरे विधेयक निर्णायर्थ पेस गर्न पुग्ने संख्या रहेको जनाउँदै पेस गरेका हुन् । विधेयक पारित भएको छ । विधेयकमा फौजदारी लगायत ८१ कानुन संशोधन प्रस्ताव गरिएको छ ।

अब विधेयक अन्तिम छलफलमा गएको छ । यसनिम्ति सांसदहरुले आवश्यक ठानेमा संशोधन प्रस्ताव पेस गर्न सक्नेछन् । सभामुख घिमिरेले संशोधन प्रस्ताव भएमा सचिवालयमा दर्ता गराउन जानकारी दिए ।