प्रश्न सोध्ने माननीयले न्यायाधीश भागबण्डामा नियुक्त हुन्छ भनेर गलत सूचना पाउनु भएछः कानुनमन्त्री गुरुङ

१८ भदौ, काठमाडौं । कानून, न्याय तथा संसदीय मामिला मन्त्री धनराज गुरुङले न्यायाधीश राजनीतिक भागबन्डामा नियुक्त हुने कुरा गलत भएको बताएका छन् । सोमबार प्रतिनिधिसभाको बैठकमा सांसदहरुले सोधेको प्रश्नको जवाफ दिँदै मन्त्री गुरुङले हरेक तहका न्यायालयमा ऐन कानुनले तोकेबमेजिम, विधि र प्रक्रियाअनुसार न्यायाधीश नियुक्त हुने बताए । 

सांसद प्रेम सुवालले सोधको प्रश्नमा उनले न्यायालय जस्तो नागरिकलाई निष्पक्ष न्याय दिने थलोमा राजनीतिक भागबन्डा नचल्ने दाबी गरे । उनले नियुक्तिमा आर्थिक लेनदेन हुने गरेको भन्ने भनाइको पनि खण्डन गरे । प्रेम सुवालले सोधेको प्रश्नको जवाफमा मन्त्री गुरुङले भने, ‘माननीयले न्यायाधीश भागबन्डामा नियुक्त हुन्छ भनेर गलत सूचना पाउनुभएको रहेछ, अब त्यो रहेन ।’

सांसद दिलेन्द्र बडू लगायत सांसदहरुको जवाफमा मन्त्री गुरुङले सरकारले ऐन कानुनभन्दा बाहिर गएर कुनै काम नगरेको र भविष्यमा पनि नगर्ने स्पष्ट पारे । नागरिकका हितका लागि सरकारले बेलाबेला कानुन संशोधन गर्न विधेयक ल्याउने काम नियमित रुपमा चल्ने विषय भएको उनको भनाइ थियो ।

कानून मन्त्री गुरुङले अब न्यायाधीशको नियुक्त विधि र प्रक्रिया अनुसार हुने बताए । उनले न्यायाधीश नियुक्ति गर्दा कुनै राजनीतिक भागबण्डा नहुने बताए । मन्त्री गुरुङले न्यायाधीश नियुक्ति न्यायोचित ढंगले गर्ने कुरा भइरहेको भन्दै त्यसमा दलीय भागबण्डा नहुने बताए । उनले न्याय सम्पादनको कामलाई छिटो, छरितो बनाउन सरकार क्रियाशील रहेको दाबी समेत गरे ।

सर्वोच्च अदालत आफैंले पनि न्याय सम्पादनको कामलाई छिटो र छरितो बनाउन विभिन्न प्रयासहरू गरिरहेको उल्लेख गर्दै मन्त्री गुरुङले सरकारले त्यसका लागि आवश्यक कानुन र व्यवस्थापकीय प्रबन्ध पनि गरिरहेको बताए ।