मधेश प्रदेशका सांसद सिंह ज्यान मुद्दामा पक्राउ

१८ भदौ, काठमाडौं । मधेश प्रदेशका सांसद अनरिुद्धकुमार सिंह यादवलाई प्रहरीले पक्राउ गरेको छ । गएकाे प्रदेश चुनावमा सप्तरीबाट ४ (२)बाट स्वतन्त्र निर्वाचित प्रदेशसभा सदस्य (प्रदेश सांसद) सिंहलाई प्रहरीले सोमबार राजपिराजबाट पक्राउ गरेको हो ।

सिंहविरुद्ध ज्यान मुद्दा २०६४ देखि मुलतबी रहेको छ । सो मुद्दा अगाडि बढाउने क्रममा उनलाई पक्राउ गरिएको हो । सिंह कांग्रेसकाट टिकट नपाएपछि स्वतन्त्र उम्मेदवार दिएर सप्तरी ४ (२)बाट निर्वाचित भएका हुन् । 

सिंहविरुद्ध बोदेबर्साइन–४ का माओवादी नेता दिपु भनिने गोविन्द चौधरीलाई २०६४ असार ९ गते अपहरण गरी वैरिया टोलमा पुर्‍याई पाँचवटा गोली हानी हत्या गरेको आरोप छ । 

मृतकका दिदी रीताकुमारी चौधरीले जिल्ला प्रहरी कार्यालयमा २०६४ असार १४ गते सिंह समेत नौ जनाविरुद्ध किटानी जाहेरी दिएकी थिइन् । हत्यामा संलग्नताका आरोपमा २०७२ देखि जगदीशप्रसाद भगत जेलमा छन् । अर्का आरोपी ताराकान्त धरौटीमा छुटका थिए भने ज्याबुल मियाँले सफाइ पाएका थिए । सिंहसहित बाँकी ७ जना फरार रहेका कारण उनीहरुको मुद्दा मुलतबीमा राखिएको थियो । 

सोही मुद्दामा प्रदेश सदस्य पक्राउ परेका हुन् । उनलाई आजै अदालतमा पेस गरिएको प्रहरीले जनाएको छ ।