जलस्रोत अनुसन्धान विकास केन्द्रका लेखा अधिकृतविरुद्ध भ्रष्टाचार मुद्दा

१८ भदौ, काठमाडौं । जलस्रोत अनुसन्धान विकास केन्द्र पुल्चोकका लेखा अधिकृत तोरणबहादुर कार्कीविरुद्ध विशेष अदालतमा भ्रष्टाचार मुद्दा दर्ता भएको छ ।

अख्तियार दुरुपयोग अनुसन्धान आयोगले कार्कीविरुद्ध ४ करोड ६७ लाख ३८ हजार ७ सय ८० रुपैयाँ गैरकानुनी सम्पत्ति आर्जन गरेको कसुरमा साेमबार भ्रष्टाचार मुद्दा दायर गरेको हो ।

२०५३ जेठ १७ देखि २०७९ मंसिर २८ सम्म कार्कीले आर्जन गरेको सम्पत्ति अनुसन्धानका क्रममा वैध आय १ करोड ८ लाख ४८ हजार ५ सय ९० मात्रै देखिएको अख्तियारको दाबी छ । 

बाँकी रकम अवैध रहेको निष्कर्षसहित आयोगले मुद्दा चलाएको हो । स्रोत नखुलेको सम्पत्तिलाई बिगो कायम गरी त्यति नै जरिवाना, स्रोत नखुलेको सम्पत्ति जफत र कैद सजाय माग दाबी आयोगले गरेको छ । कार्कीकी पत्नी उर्मिला थापा कार्कीलाई पनि मुद्दामा प्रतिवादी बनाइएको छ ।