सत्तारुढ एकीकृत समाजवादीले बनायो एमसीसी अनुगमन समिति

१८ भदौ, काठमाडौं । सरकार साझेदार दल नेकपा (एकीकृत समाजवादी)ले अमेरिकी सहयोग परियोजना एमसीसी कार्यान्वयनको अनुगमन गर्न ५ सदस्यीय अनुगमन समिति गठन गरेको छ । 

सोमबार पार्टीको सचिवालय बैठकबाट गठित समितिलाई संसदबाट भएको व्याख्यात्मक टिप्पणीलाई एमसीसीले सम्झौताको अंग बनाएको वा नबनाएको अनुगमन गर्ने र संसदीय अनुगमनका लागि दबाब दिने जिम्मेवारी तोकेको पार्टीका प्रचार विभाग प्रमुख जगन्नाथ खतिवडाले जानकारी दिएका छन् । 

पार्टी उपाध्यक्ष राजेन्द्र पाण्ड नेतृत्वको समिति सदस्यहरुमा उपमहासचिव गंगालाल तुलाधर, जगन्नाथ खतिवडा र गरिमा शाह रहेका छन् । त्यसमा एकजना विषयविज्ञ रहने खतिवडाले बताए ।

तत्कालीन सरकारसँथ भएको अमेरिकाको मिलेनियम च्यालेञ्च कर्पोरेस (एमसीसी)द्वारा परिचालित ५५ अर्ब रुपैयाँको परियोजनासम्बन्धी सम्झौता यही भदौ १५ बाट नेपालमा कार्यान्वयनमा प्रवेश गरिसकेको छ । कायाृन्वयनसँगै परियोजनामाथि राष्ट्रियतासँग जोडेर माओवादी केन्द्र लगायत विभिन्न राजनीतिक दलहरुले प्रश्न उठाइरहेका छन् । उनीहरूले व्याख्यात्मक टिप्पणीलाई सम्झाैताकाे अंग बनाउनुपर्ने बताउँदै आएका छन् ।