दशैं अगाडि काठमाडाैं उपत्यकामा मेलम्चीको पानी वितरण नहुने

१९ भदौ, काठमाडौं । मेलम्चीको पानी काठमाडौं उपत्यकामा दशैं भन्दा अगाडि वितरण नहुने भएको छ । पछिल्लोपटक लगातार परिरहेको अविरल वर्षाका कारण सिन्धुपाल्चोकको हेलम्बु गाउँपालिका–१ अम्बाथानमा रहेको मेलम्ची खानेपानी मुहानको हेडवर्क्स गेग्रानले पुरिएपछि पानी पठाउने काम हुन नसक्ने भएको हो । 

सुरुङमा पानी पठाउने मुख्य स्थान १ नम्बर गेट र पानी खोल्ने तथा बन्द गर्ने ९ नम्बर गेट बाहिर बाढीले ढुंगामाटो ल्याई थुपारेको मेलम्ची खानेपानी आयोजनाले जनाएको छ । 

वर्षात् र पहिरो जारी रहेका कारण अहिले मुहान क्षेत्रमा जानसक्ने अवस्था नरहेको जनाएको छ । वर्षात् रोकिएपछि मात्र मुहानसम्म जाने बाटो बन्ने र त्योबेलासम्म दशैं आइसक्ने आयोजनाको दाबी छ । मुहान क्षेत्रको अवस्था बुझ्न आइतबार ड्रोन प्रयोग गरिएको थियो । मनसुनका बेला मुहानमा हुन सक्ने बाढी-पहिरोबाट हुने संभावित क्षति राेक्न मेलम्चीको पानी गएको असार पहिलो सातादेखि पानी पठाउन बन्द गरिएको थियो ।

मेलम्चीको पानी उपत्यकामा पहिलोपटक २०७७ फागुन २२ मा सुन्दरीजलमा ल्याइ चैत १६ बाट वितरण गरिएको थियो । त्यसपछि हरेक वर्ष वर्खे झारी सुरुसँगै मुहान बन्द गर्दै आएको छ । झरी हटेपछि पुनः पठाइने गरिन्छ ।