मुख्यमन्त्री थापाविरुद्धको रिटमाथि सर्वोच्चमा दोस्रो दिन सुनुवाइ सुरु

१९ भदौ, काठमाडौं । कोशी प्रदेशका मुख्यमन्त्री उद्धव थापाले भदौ ४ मा लिएको विश्वासको मत असंवैधानिक भन्दै सर्वोच्च अदालतमा दायर भएको रिट निवेदनमा दोस्रो दिनको सुनुवाइ सुरु भएको छ । 

न्यायाधीश सपना प्रधान मल्ल, कुमार चुडाल र नहकुल सुवेदीको पूर्ण इजलासमा मंगलबार सुनुवाइ चलिरहेको छ । सोमबार सुनुवाइ सुरु गरिएको उक्त मुद्दामाथि बहस नसकिएपछि  ‘हेर्दाहेर्दै’मा राखिएको थियो । रिट निवेदक एमालेका नेता एवं पुर्वमुख्यमन्त्री हिक्मतकुमार कार्कीले मा मुख्यमन्त्री थापा, प्रदेश प्रमुख परशुराम खापुङ लगायतलाई विपक्षी बनाएका छन् ।

उनले थापा नेतृत्वको सरकार बदर गरी संविधानकाे धारा १६८ काे (३) बमाेजिम प्रदेशसभाका सबैभन्दा ठूलाे दल एमालेको तर्फबाट आफ्नो नेतृत्वमा सरकार गठन गर्ने परमादेश माग गरेका छन् । उनले रिट भदाै ६ मा दायर गराएका थिए ।

रिटमा थापाले विश्वासको मत लिँदा सभाध्यक्ष इस्राइल मन्सुरीले दिएको मत असंवैधानिक रहेको जिकिर गरिएको छ । तर विपक्षी थापाले सर्वोच्चमा पेश गरेको लिखित जवाफमा विश्वासको मत संवैधानिक तरिकाबाट लिइएको दाबी पेस गरेका छन् ।

सुनवाई आजै सकेर आजै आदेश आउने संभावना रहेको सर्वोच्च प्रशासन स्रोतले जनायो ।