सोनमा गाउँपालिका कार्यालयमा विद्यार्थीद्वारा प्रदर्शन, प्रहरीद्वारा दर्जन बढी अश्रुग्यास सेल प्रहार

१९ भदौ, काठमाडौं । महोत्तरीको सोनमा गाउँपालिकाको कार्यालयमा विद्यार्थीले प्रर्दशन गरेका छन् । षडयन्त्रपूर्वक शिक्षकको सरुवा गरेको भन्दै सोनमा माध्यमिक विद्यालयका विद्यार्थीहरुले मंगलबार प्रदर्शन गरेका छन् । 

प्रदर्शनका क्रममा बाक्लो संख्यामा प्रहरी परिचालन गरिएको छ । प्रदर्शनकारीले कार्यालय तोडफोडको प्रयास गरेपछि प्रहरीले रोकेको छ । रोक्ने क्रममा प्रहरीमाथि प्रदर्शनकारीबाट ढुंगामुडा भएपछि केहीबेर झडप समेत भएको छ । 

दिउँसो १ बजेदेखि गाउँपालिका कार्यालय क्षेत्र तनावग्रस्त बनेको बताइएको छ । भीड तितरबितर पार्न प्रहरीले एक दर्जनभन्दा बढी सेल अश्रुग्यास प्रहार गरेको छ । प्रदर्शनकारी र प्रहरीतर्फ केही संख्यामा घाइते भएको जनाइएको छ ।