गृहमन्त्रीले राजीनामा दिन नहुने दीक्षितको तर्क, बालेनको अभिव्यक्तिप्रति जनाए आपत्ति

१९ भदौ, काठमाडौं । नागरिक अगुवा एवं राजनीति विश्लेषक डा.सुन्दरमणि दीक्षितले उपप्रधान तथा गृहमन्त्री नारायणकाजी श्रेष्ठले कुनै पनि हालतमा पदबाट राजीनामा दिन नहुने धारणा राखेका छन् । 

आज काठमाडौंमा आयोजित कार्यक्रममा डा. दीक्षितले सरकारले राम्रो काम गरिरहेको र त्यसमा गृहमन्त्री श्रेष्ठले नागरिक र सुशासनको पक्षमा सशक्त ढंगले काम गरिरहेको भन्दै राजीनामा दिन नहुने बताएका छन् । उनले सरकारले छानबिन थालेका भ्रष्टाचार काण्डको निष्पक्ष अनुसन्धान नहुने भएकाले तत्काल गृहमन्त्रीको राजीनामा माग्नु गलत रहेको बताए । 

‘गृहमन्त्रीलाई कुनै पनि हालतमा हटाउनुहुँदैन । उनलाई हटाएमा बालुवाटार जग्गा प्रकरण, नक्कली भुटानी शरणार्थी प्रकरण, गिरीबन्धु टी स्टेट र सुन तस्करी प्रकरण सबै बिथोलिने देखिन्छ’, दीक्षितले भने, ‘त्यसैले अहिले गृहमन्त्रीको राजीनामा माग्नुभन्दा अनुसन्धान गर्न सहयोग गर्नुपर्छ तर अहिलेसम्म भ्रष्टाचार काण्डको अनुसन्धान हेर्दा भने हात्ती आयो हात्ती आयो फुस्साजस्तै भइरहेको छ ।’ गिरीबन्धु टी स्टेट, यति हाेल्डिङ, वाइडबडी, ओम्नी प्रकरण छानबिन गर्न सरकारसँग माग गरे ।

विश्लेषक दीक्षितले काठमाडौँ महानगरपालिकाका प्रमुख बालेन शाहको अभिव्यक्तिप्रति पनि आपत्ति जनाए । उनले बालेनले आफ्नो पदीयता मर्यादा कायम राख्दै संयमित हुनुपर्नेमा जोड दिए । दीक्षितले मेयर पदमा बसेर सरकारप्रति अराजक र उदण्ड शैलीमा टिप्पणी गर्न नहुने पनि बताए । उनले पद र जिम्मेवारीको गरिमा ख्याल गर्न सुझाए ।