जहाज कुर्दाकुर्दै नाबालकको ज्यान गएको घटनामा उच्च अदालतद्वारा कारण देखाउ आदेश

१९ भदौ, ललितपुर । पाटन उच्च अदालतले हुम्लामा हवाई उडान रोकेका कारण ६ महिने बालकको मृत्यु भएको घटनामा नेपाल नागरिक उड्डयन प्राधिकरणका महानिर्देशक प्रदीप अधिकारी समेतलाई कारण देखाऊ आदेश दिएको छ । 

बालकको मृत्यु प्राधिकरण लगायतको लापरवाहीले भएको दाबीसहित मृतक परिवालाई क्षतिपूर्तिसहित न्यायिक सम्बोधनको माग गर्दै अधिवक्ता गणेश ओलीले दायर गराएको रिटमा मंगलबार न्यायधीश दुर्गबहादुर विश्वकर्माको एकल इजलासमा सुनवाइपछि विपक्षीहरूकाे नाममा कारण देखाउ आदेश जारी गरेकाे हाे । 

मौसम खराबीको कारण देखाउँदै साउन १२ देखि हुम्ला लगायत हिमाली जिल्ला प्राधिरकणका महानिर्देशक अधिकारीको निर्णयले उडान दिउँसो १२ बजेदेखि पछिका लागि बन्द गरेको थियो । उडान रोकिँदा समयमा उपचारका लागि सुविधायुक्त अस्पतालमा पुर्याउन नपाउँदा बालकको ज्यान गएको आफन्तको भनाइ छ ।

गम्भीर बिरामी रहेका  हुम्ला, सिमकोट गाउँपालिका-६ का ६ महिने बालक इमरान सुनारको मृत्यु भएको थियाे ।