इन्जिनियरिङ स्नातक तहको शुल्क बृद्धिबारे अध्ययन गर्न पराजुलीको नेतृत्वमा समिति गठन

२० भदौ, काठमाडौं । त्रिविकाे इन्जिनियरिङ अध्ययन संस्थानले आंगिक क्याम्पसमा स्नातक तहमा गरेको शुल्क वृद्धि पुनरावलोकन गर्न सहप्राध्यापक हरिराम पराजुलीको नेतृत्वमा ११ सदस्यीय समिति गठन गरेको छ । शुल्क वृद्धि फिर्ताको माग गर्दै आन्दोलनमा उत्रिएका विद्यार्थी समूहसँग भएको सहमति अनुसार समिति गठन गरिएको हो ।  

समितिमा थापाथली, पुल्चोक इन्जिनियरिङ क्याम्पसका स्ववियु सभापतिहरूलाई पनि सदस्य राखिएको छ । यो समितिलाई ७ दिनभित्र शुल्क पुनरावलोकनको काम सकेर प्रतिवेदन दिन भनिएको छ । संस्थानले शैक्षिक सत्र २०८०/०८१ देखि लागु हुने गरी स्नातक तहमा शुल्कवृद्धि गरेपछि विद्यार्थीहरू आन्दोलनमा उत्रिएका थिए । 

शुल्कवृद्धि फिर्ताको मागसहित नेविसंघ पुल्चोकका नेता सुलभ चापागाईं आमरण अनशन नै बसेका थिए । विद्यार्थी संघसंगठनहरूले प्रधानमन्त्री निवास बालुवाटार घेराउदेखि विभिन्न संघर्षका कार्यक्रम गरेपछि त्रिविले छलफल गरी शुल्क पुनरावलोकन गर्ने सहमति गरेको थियो । ३ लाख १३ हजारबाट संस्थानले एकै पटक वृद्धि गरी ७ लाख ७५ हजार ४ सय २० रुपैयाँ पुर्याएपछि विद्यार्थीहरू आनदोलनमा उत्रिएका थिए ।