एनआरएनलाई नेपाली नागरिकता दिन नियमावली

२० भदौ, काठमाडौं । नेपाली नागरिकता त्यागेर अन्य मुलुकको नागरिकता लिइकसकेका गैरआवासीय नेपाली (एनआरएन)लाई नेपाली नागरिकता दिनेसम्बन्धी नियमावली मन्त्रिपरिषदबाट पारित गरेको छ । 

एनआरएनलाई आर्थिक र सांस्कृतिक अधिकारसहितको गैरआवासीय नेपाली नागरिकता दिने प्रावधानसहितको नागरिकता नियमावली भदौ १२ मा बसेको मन्त्रिपरिषदले पारित गरेको हो । एनआरएनलाई नेपाली नागरिकता दिने व्यवस्था संविधानले गरेको छ । नियमावली पारित भएकोबारे सरकारले भने औपचारिक रुपमा जानकारी दिएको छैन । 

नियमावलीअनुसार यो नागरिकता लिएपछि नेपालमा लगानी गर्न, सम्पत्ति राख्न र नेपालको सांस्कृतिक आधारमा गतिविधि गर्न पाइनेछ । तर, राजनीति र मतदान गर्न, सरकारी नियुक्ति खान र नेपालको हित विपरीत कार्य गर्न पाइने छैन । 

राष्ट्रियता विरोधी गतिविधि गरेको पाइएमा नागरिकता रद्द गर्ने व्यवस्था गरिएको छ । यो नागिरकता लिन नेपाली वंशजको नागरिकता त्याग गरेको निस्सा पेस गर्नुपर्नेछ ।