तस्करी सुन र बालुवाटार जग्गा प्रकरणमा मुछिएकालाई अतिरिक्तमा राखेर ५८ जना सहसचिवको सरुवा

२० भदौ, काठमाडौं । सरकारले ललितानिवास जग्गा हिामिना र तस्करी सुन प्रकरणको अनुसन्धानमा जोडिएकाहरुलाई अतिरिक्त समूहमा रााखेर ५८ जना सहसचिवको सरुवा गरेको छ । अध्यागमन विभागमा महानिर्देशक झलकराम अधिकारीसहित प्रकरणसँग जोडिएकालाई अतिरिक्तमा राखेर दुइ दिन अघि सहसचिहरुको सरुवा भएको हो । उनीहरुलाई संघ, प्रदेश र स्थानीय तहमा पदस्थपन गरिएको छ ।  

काठमाडौं मालपोत कार्यालयमा रहकाबेला ललिता निवास जग्गामा मुछिएका सुशील वैद्यलाई संघीय मन्त्रालयको अतिरिक्त समूहमा राखिएको छ । दाङमा प्रमुख जिल्ला अधिकारी रहेकाबेला जग्गा काण्डमा छानबिन हुन थालेपछि उनलाई गृह मन्त्रालय तानिएको थियो । तर, सुन बरामद भएकाबेला बिदामा रहेका त्रिभुवन विमानस्थल भन्सार कार्यालयका प्रमुख भन्सार प्रशासक अरुण पोखरेललाई भने सुदूरपश्चिमको आर्थिक मामिला मन्त्रालयमा पठाइएको छ । 

यसअघि उनको अर्थ मन्त्रालयमा सरुवा भएको थियो । सुन काण्डमै मुछिएका अध्यागमन विभागमा महानिर्देशक झलकराम अधिकारीलाई संघीय मामिला मन्त्रालयको अतिरिक्त समूहमा राखिएको छ । उनलाई सुन काण्डका मुख्य व्यक्तिको रुपमा चिनिएका दावा छिरिङसँग सिधा सम्पर्क रहेको भन्दै सीआइबीले बयान लिइरहेको छ । उनलाई राजस्व अनुसन्धान विभागको महानिर्देशक भएकाबेला चोरीपैठारी रोक्न असफल भएको आरोपमा गत कात्तिकमा प्रधानमन्त्री कार्यालयमा सरुवा गरिएको थियो ।

प्रधानमन्त्री पुष्पकमल दाहाल प्रचण्डले अधिकारीलाई उनलाई केही दिन आफ्नो कार्यालयमा राखेर गृह मन्त्रालय पठाएका थिए । गृह पठाए लगत्तै अध्यागमनको महानिर्देशक बनाइएको थियो । कर, राजस्व र अध्यागमनमा रहँदा उनले सुन तस्करसँग सम्बन्ध बढाएको सीआइबीको दाबी छ । यस्तै गण्डकी प्रदेशको भौतिक पूर्वाधार मन्त्रालयमा सचिव रहेको तुलसीराम भट्टराईलाई संघीय मन्त्रालयको अतिरिक्त समूहमा राखिएको छ ।

बलाराम रिजाललाई गण्डकी प्रदेशको आर्थिक मामिला मन्त्रालयको सचिवमा पठाइएको छ । कम्पनी रजिष्ट्रारको कार्यालयमा रजिष्ट्रार पदमा डेढ वर्षभन्दा बढी समय बसेका महेश बराललाई योजना आयोगमा सरुवा गरिएको छ । लोकसेवा आयोगका प्रवक्ता तोयनारायण सुवेदीलाई ऊर्जा, सिंचाई तथा जलस्रोत मन्त्रालयअन्तर्गत सरुवा गरिएको छ । त्यस्तै लोकसेवा आयोगमा रहेका प्रदीप कोइरालालाई वन तथा वातावरण मन्त्रालय सरुवा गरिएको छ ।

वाग्मती पदेशको आर्थिक मामिला मन्त्रालयका सचिव महेश आचार्यलाई अर्थ मन्त्रालय सरुवा गरिएको छ । गृहका शिवराम न्यौपानेलाई लोकसेवा आयोग पठाइएको छ । योजना आयोगका प्रकाश दाहाललाई बाग्मतीको आर्थिक मामिला मन्त्रालयको सचिवमा सरुवा गरिएको छ । वाग्मती प्रदेश मुख्यमन्त्रीको कार्यालयमा रहेको शिवराम गेलाललाई गृह मन्त्रालय सरुवा गरिएको छ । वाग्मती प्रदेश प्रमुखको कार्यालयमा रहेका ओमबहादुर खड्कालाई नेपालगन्ज उपमहानगरपालिकाको प्रमुख प्रशासकीय अधिकृतमा सरुवा गरिएको छ ।

संघीय मन्त्रालयमा सरुवा र पदस्थापनको भूमिकामा रहेका हेमराज तामाङलाई संस्कृति तथा पर्यटन मन्त्रालयअन्तर्गत सरुवा गरिएको छ । तत्कालिन संघीय मन्त्री अमनलाल मोदीले तामाङलाई उक्त जिम्मेवारी दिएका थिए । संघीय मन्त्रालयमा राष्ट्रिय योजना आयोगबाट सुमन दाहाललाई लगिएको छ । सुदूरपश्चिम प्रदेश आर्थिक मामिला मन्त्रालयका सचिव नारायणप्रसाद रेग्मीलाई संघीय मामिला मन्त्रालय सरुवा गरिएको छ । 

सहरी विकास मन्त्रालय अन्तर्गत रहेका रवीन्द्र बोहरालाई सार्वजनिक खरिद अनुगमन कार्यालयमा सरुवा गरिएको छ । साही मन्त्रालयका प्रदीप परियारलाई योजना आयोग सरुवा गरिएको छ । भन्सार विभागको महानिर्देशकसमेत भइसकेको दाहाललाई महत्वपूर्ण महाशाखा जिम्मा लगाउने तयारी स्वरुप संघीय मामिला तथा सामान्य प्रशासन मन्त्रालय लगिएको छ ।