मधेश प्रदेशका स्वतन्त्र सांसद अनिरुद्ध सिंहको पद निलम्बन

२० भदौ, काठमाडौं । ज्यान मुद्दामा पक्राउ परी जेल चलान भएका मधेश प्रदेशका स्वतन्त्र सभासद अनिरुद्ध प्रसाद सिंह यादवको पद निलम्वन भएको छ । जिल्ला अदालत सप्तरीले उनलाई मंगलबार पुर्पक्षका लागि थुनामा राख्ने आदेश दिएको थियो । 

जेल चलान भएसँगै यादवको सांसद पद निलम्बित भएको उनको सचिवालयले बुधबार जनाएको छ । मुद्दाको अन्तिम टुंगो नलागेसम्म उनको सांसद पद निलम्बनमा रहनेछ । बोदेबर्साइन नगरपालिका–५ यादव गत आमचुनावमा सप्तरी ४ (ख) मा स्वतन्त्र उम्मेदवार बनेर प्रत्यक्ष निर्वाचित भएका थिए । यादवलाई राजविराज कारागारमा राखिएको छ ।

उनीविरुद्ध २०६४ असार ९ गते तत्कालीन खोक्सरप्रवाहा गाविस–१ का तत्कालीन नेकपा (माओवादी)का नेता भिपु भनिनु ३२ वर्षीय दिपु भन्ने गोविन्द चौधरीको अपहरणपछि नेङ्गडा गाविस–५ वैरिया टोलमा गोली प्रहार गरी हत्या गरिएको घटनामा संलग्नताको अभियोग छ । घटनाको १७ वर्षपछि यादवलाई पक्राउ गरी पुर्पक्षका लागि थुनामा पठाइएको छ ।

चौैधरीकी दिदी रीताकुमारीले असार १४ मा सप्तरी प्रहरीमा यादवसहित ९ जनाविरुद्ध किटानी जाहेरी दिएकी थिइन् । जाहेरी परेपनि उनी फरार रहँदै आएका थिए । पछि जसपामा लागेर राजनीतिक प्रभावमा जोगिँदै आएपनि गत चुनावमा जसपाले टिकट नदिँदा उनी स्वतन्त्र उठेका थिए । त्यसपछि उनको राजनीतिक शक्ति कमजोर बन्दै गएको अवस्थाबीच प्रहरीले मुलतबीमा राखिएको फाइल खोलेर पक्राउ गरेको हो । उनको पक्राउमा जसपासँगको तिक्तता कारक रहेको बताइन्छ । 

अहिले मधेश प्रदेशशमा जसपा नेतृत्वको सरकार छ भने केन्द्रमा माओवादी नेतृत्वको सरकार छ । प्रधानमन्त्री प्रचण्डले पुराना ठूला काण्डका फाइल खाेल्ने र दाेषीलाइ कारवाहीकाे दायरामा ल्याउने क्रम नराेकिने बताइरहेका बेला यादव डेढ शक पुरानाे हत्या घटनामा जेल परेका छन् ।