किमाथांका नाका खुलाउनेबारे प्रधानमन्त्रीको चीन भ्रमणमा छलफल हुन्छ : परराष्ट्रमन्त्री साउद

२० भदौ, कमठमाडौं । परराष्ट्रमन्त्री एनपी साउदले प्रधानमन्त्री पुष्पकमल दाहाल ‘प्रचण्ड’को आगामी चीन भ्रमणमा संखुवासभाको किमाथांका नाका खुलाउने विषय प्रमुख एजेण्डामा राखिएको बताएका छन् । 

बुधबार संखुवासभाको तुम्लिङटारमा सञ्चारकर्मीसँगको कुराकानीमा परराष्ट्रमन्त्री साउदले किमाथांका नाका खुलाउने विषय नेपालका लागि मुख्य रहेको बताए । सो कुरा प्रधानमन्त्रीको असोज पहिलो साता हुने चीन भ्रमणमा राखिने उनको भनाइ छ ।

कारोना संक्रमण फैलिने डरले चीन सरकारले २०७६ माघ ५ देखि बन्द भएकाे किमाथांका नाका अझै खुलेकाे छैन । नाका बन्द भएपछि भोटखोला गाउँपालिकामा सदरमुकाम खाँदबारीबाट महंगोमा खाद्यान्न ढुवानी गर्न विवश छन् ।

भ्रमणमा चीनसँग जोडिने सडक  स्तरोन्नति, किमाथांका विद्युत् परियोजना र ट्रान्समिसन लाइन, तातापानी र रसुवागढी नाकाबाट व्यापार आदानप्रदानलाई प्रभावकारी बनाउने विषयमा गहन छलफल हुने बताए ।