एसिया कप खेलेर फर्किएको क्रिकेट टोलीको विमानस्थलमा भव्य स्वागत

२० भदौ, काठमाडौं । एसिया कप क्रिकेट खेलेर नेपाल फर्किएको राष्ट्रिय टोलीको भव्य स्वागत गरिएको छ । श्रीलंका र पाकिस्तानमा जारी एसिया कप क्रिकेटमा नेपाल समूह चरणबाट घर फर्केको हो । नेपाली टोलीलाई स्वागत गर्न सशस्त्र प्रहरीको ब्याण्ड टोलीसमेत विमानस्थलमा लगिएको थियो । 

ब्याण्ड टोलीले मंगलधुन बजाएर टोलीको स्वागत गरेको थियो । नेपाल क्रिकेट संघका पदाधिकारी तथा क्रिकेट समर्थकले टिमलाई स्वागत गरेका थिए । समूह चरणमा भारत र पाकिस्तानविरुद्ध निडर र साहसिक प्रदर्शन गरेको भन्दै क्रिकेट समर्थकहरु टोलीलाई स्वागत गर्न विमानस्थल पुगेका हुन् । 

टोलीले पाकिस्तान र श्रीलंकामा दुई खेल खेलेको थियो । पाकिस्तानमा भएको पहिलो खेलमा नेपाली टोली गत बिहीबार पाकिस्तानसँग २३८ रनले पराजित भएको थियो । भारतसँग खेल खेल्न श्रीलंका पुगेको टोली १० विकेटले पराजित भएको थियो । भारतसँगको खेलमा पानीले खेल बिथोलेको थियो । भारतसँग पराजित भएपछि नेपाल एसियाकपबाट बाहिरिएको थियो ।