काठमाडौंमा चोरीका मोटरसाइकल नम्बर परिवर्तन गरेर चलाइरहेकाे अवस्थामा २ जना पक्राउ

२० भदौ, काठमाडौं । काठमाडौंंका विभिन्न स्थानबाट चोरीका मोटरसाइकलसहित २ जनालाई प्रहरीले पक्राउ गरेको छ । काठमाडौं महानगरपालिका १६ बालाजुस्थित चप्पलकारखानाबाट ट्राफिक प्रहरीको चेकजाँचका क्रममा मोटरसाइकलसहित उनीहरुलाई पक्राउ गरिएको हो । 

पक्राउ पर्नेमा नुवाकोटको सुर्यगढी गाउँपालिका २ घर भइ हाल काठमाडौँको लोलाङ बस्ने ४५ वर्षीय दिपेन्द्र तामाङ र नुवाकोटकै लिखु गाउँपालिका २ घर भइ काठमाडौंको बाइपास बस्ने २८ वर्षीय सन्तोष घले रहेका छन् । 

गत जेठ २ गते काठमाडौँको मनमैजुबाट बागमती प्रदेश ०२–०२७ प ७५८० नम्बरको र गत जेठ २९ गते टोखा नगरपालिका–१ झोरबाट बागमती प्रदेश ०२–०२२ प ४४ ५४ नम्बरको २ सय २० सीसीको पल्सर मोटरसाइकल हराएको उजुरीका आधारमा आकस्मिक चेकजाँच गर्दा फेला परेको हो । 

उक्त मोटरसाइकलहरु वास्तविक नम्बर परिवर्तन गरी प्रदेश ३–०२–००७ प ३३ ९९ नम्बर राखी चलाइरहेको अवस्थामा तामाङलाई र बागमती प्रदेश ०२–०१८ प ०००८ नम्बर राखि चलाइरहेको अवस्थामा घलेलाई काठमाडौँ उपत्यका ट्राफिक प्रहरी कार्यालयमा रहेको पीडित सहायता ‍ईकाइबाट खटिएको टोलीले मोटरसाइकलसहित पक्राउ गरेको हो । 

तामाङलाई प्रहरी वृत्त बालाजु र घलेलाई प्रहरी वृत्त महाराजगञ्जमा थप अनुसन्धान तथा कारबाहीका लागी पठाइएको छ । सवारी साधन हराएमा ट्राफिक प्रहरीको हटलाइन नम्बर १०३, नेपाल प्रहरीको हटलाइन नम्बर १०० मा फोन गर्न र नजिकको प्रहरी कार्यालयमा निवेदन दिन समेत ट्राफिक कार्यालय रामशाह पथले अनुरोध गरेको छ ।