खुकुरी प्रहारबाट घाइते कांग्रेस सहमहामन्त्री यादव खतरामुक्त

२० भदौ,काठमाडौं । बुधबार दिउँसो भृकृटीमण्डमा आयोजित कार्यक्रममा सहभागी भएर बाहिरिने क्रममा खुकुरी आक्रमणमा परी घाइते भएका नेपाली कांग्रेसका सहमहामन्त्री महेन्द्र यादवको स्वास्थ्य अवस्था खतरामुक्त रहेको जनाएका छन् । 

रिपोर्टर्स क्लब नेपालको साक्षात्कारमा सहभागी भएर निस्किने क्रममा अभियन्ता भनिने नुवाकोट विदुर नगरपालिका–७ का श्यामबहादुरले झोला लुकाएर ल्याएको खुकरीले हानेका थिए । खुकुरीले यादवको टाउकोमा चोट लागेको छ । रक्तमुछेल भएका यादवलाई तत्काल सुरक्षाकर्मीले उद्धार गरी वीर अस्पतालको ट्रमा सेन्टर पुर्याएर उपचार गराइरहेको छ । 

उनको अवस्था खतरामुक्त रहेको उपचारका संलग्न चिकित्सकहरुले बताएका छन् । उनलाई आजै डिस्चार्ज गरिने बताइएको छ । खुकुरी प्रहार गर्ने सापकोटालेआफू राजावादी दाबी गरेका छन् । सापकोटालाई सिंहदरबार वृत्तमा राखेर अनुसन्धान भइरहेको प्रहरीले जनाएको छ । 

सापकोटा साक्षात्कार कार्यक्रममा दर्शकदीर्घमा बसेर यादवको भाषण सुनेका थिए । भाषणका क्रममा सुन तस्करी, भुटानी शरणार्थी प्रकरण, ललितानिवास प्रकरणमा सरकारले चालेको कदमको विरोधमा धारणा राखेको र त्यो सुनेर रिस उठेपछि खुकुरी हानेको सापकोटाले प्रारम्भिक बयान दिएको बताइएको छ । उनले नक्कली भुटानी शरणार्थी प्रकरणमा कांग्रेस नेता बालकृष्ण खाणलाई फसाइएको धारणा राखेका थिए ।

तर त्यही विषय मात्र घटनाका कारण नहुन सक्ने भन्दै थप अनुसन्धान भइरहेको प्रहरीले जनाएको छ । पक्राउ पर्दै गर्दा उनले राजातन्त्रको पक्षमा नारा समेत लगाएका थिए ।