अमेरिकी सेनाको टोली सैन्य विमानमार्फत काठमाडौं उत्रिँदै

२१ भदौ, काठमाडौं । संयुक्त राज्य अमेरिकाको एक सैनिक टुकडी बिहीबार काठमाडौं आउँदैछ। यही भदौ २४ गतेदेखि असोज १२ सम्म काठमाडौंमा हुने नेपाली सेनासँगको संयुक्त सैन्य अभ्यासका लागि टुकडी काठमाडौं उत्रिने भएको हो । टुकडी बन्दोबस्तीका सामग्रीसहित अमेरिकी वायु सेनाको विमानद्वारा त्रिभुवन अन्तर्राष्ट्रिय विमानस्थलमा अवतरण गर्ने नेपाली सेनाले जनाएको छ । 

यसअघि देखि नै नेपालमा संयुक्त सैन्य अभ्यास भएको थियो । काठमाडौंको शिवपुरीस्थित भैरवनाथ गणमा रहेको रेञ्जर बटालियनबाट अमेरिकी सैनिकको सैन्य अभ्यास लगायत अन्य गतिविधिमा सहकार्य गर्ने गरिएको बताइन्छ ।

यसपटकको संयुक्त सैन्य अभ्यासमा  नेपाली सेनाका ३० जना र अमेरिकी सेनाका १२ जना गरी ४२ जना सहभागी हुने जनाइएको छ । अभ्यासमा विपद् व्यवस्थापन, खोज तथा उद्धार, मानवीय सहायता, युद्धकलालगायत विषयमा अनुभव तथा ज्ञान आदानप्रदान गरिनेछ ।