नेपालको गाँजा र चरेश हङकङको एयरपोर्टमा, डीएसपी नेतृत्वमा छानबिन समिति

२१ भदौ, काठमाडौं । नेपालको विमानस्थल भएर हङकङमा लागूऔषध गाँजा र चरेश जाने गरेकाे पाइएकाे छ । नेपालमा उत्पादित लागूऔषध मानिने गाँजा चरेस हङकङ पुगेको स्रोतले जनाएको छ । हङकङ विमानस्थलमा नेपालबाट गएको सामान बरामद भएपछि मात्रै नेपाल प्रहरीले त्यस बारेमा जानकारी पाएको छ । सो विषयमा छानबिन गर्न लागूऔषध नियन्त्रण ब्यूरोले डीएसपीको संयोजकत्वमा छानबिन समिति बनाएको छ ।  

प्रहरी उच्च स्रोतले दिएको जानकारी अनुसार साउन २६ गते नेपाल एयरलाइन्सको विमानमार्फत गाँजा र चरेस हङकङ पुगेको हो । विराट ग्लोबल प्राइभेट लिमिटेडले पठाएको सामानमा गाँजा र चरेश भेटिएको हो । हङकङ प्रहरीले सो गाँजा चरेस बरामद गरेपछि नेपाल प्रहरीलाई जानकारी गराएको थियो ।

साउन ३१ गते हङकङ प्रहरीले पत्राचार गरी नेपाली अधिकारीलाई जानकारी गराएको भएपनि यसलाई गुपचुप राखिएको थियो । व्युरोले डीएसपी अनन्तराम शर्माको नेतृत्वमा छानबिन समिति बनाएकाे छ । ‘छानबिन चलिरहेको छ, उता कति परिणाम गएको हो भन्ने जानकारी आएको छ, त्यस बारेमा के कसरी कमजोरी भयो भन्ने बारेमा प्रहरीले अनुसन्धान गरिरहेको छ’, प्रहरी स्रोतले भन्यो ।

गत साउन २६ गते  नै सो गाँजा र चरेश हङकङ गएको खुलेको छ । कार्गो चेकिङमा वरिष्ठ सई निरञ्जन पनेरुकाे डियूटी भएकाले त्यसमा उनको भूमिका कस्तो छ भनेर अनुसन्धान भइरहेको छ । व्यूरोले दिएको जानकारी अनुसार प्रहरी सहायक निरीक्षक (असई)द्वय कैलाश राउत र विष्णुबहादुर थापासहित हवल्दार निरकुमारी राई र प्रदीप बस्नेत समेत त्यहाँ खटिएका थिए । पनेरुकै संलग्नतामा गाँजा चरेस बाहिरिएको हुनसक्ने व्यूरोको आशंका छ । यद्यपि सो विषयमा अनुसन्धान भइरहेकाले केही जानकारी दिइएको छैन ।

विराट ग्लोबल प्राइभेटका सञ्चालकसँग पनेरुको सम्बन्ध रहेको खुलेको स्रोतले बतायो । कार्गोमार्फत गाँजा चरेस पठाउँदा वरिष्ठ सई पनेरुले नै सहजीकरणका लागि निर्देशन दिएको ब्यूरोको प्रारम्भिक छानबिनमा देखिएको छ ।

पनेरु विगत नौ वर्षदेखि लागुऔषध नियन्त्रण ब्यूरोमा कार्यरत छन् । उनी यसअघि समेत विवादमा मुछिएका प्रहरी कर्मचारी हुन् । त्यति बेला उनलाई २ नम्बर प्रहरी गण (सामाखुसी)मा तानिएको थिए  । शक्तिकेन्द्रको दवावमा उनी पुनः सोही ब्यूरोमा फर्किएका थिए ।

ब्यूरोको प्रारम्भिक छानबिनका क्रममा किताबका रूपमा ‘प्याकिङ’ गरेर गाँजा चरेस तस्करी गरिएको देखिएको छ । त्यसलाई बिना चेकिङ पठाइएको समेत खुलेको छ । केही वर्ष अघि नेपाली गलैँचामा पनि गाँजा चरेश बाहिरिने गरेको भन्दै कुटनीतिज्ञहरूले नेपाल सरकारको ध्यानाकर्षण गराएका थिए ।