बालकृष्ण खाणसहित २० जनाको रिट न्यायाधीश पौडेल र अधिकारीको इजलासमा

२१ भदौ, काठमाडौं । नक्कली भुटानी शरणार्थी प्रकरणको मुद्दामा पुर्पक्षका लागि विभिन्न जेलमा रहेका थुनुवाहरुले उच्च अदालतमा पाटनमा दायर गराएका रिट निवेदनको पेसी न्यायाधीश सुभाष पौडेल र दीपेन्द्रअधिकारीको संयुक्त इजलासमा परेको छ । बिहीबार सुनुवाइका लागि पेसी तोकिएको छ । 

नक्कली शरणार्थी प्रकरणमा सरकारी लिखत कीर्ते, ठगी, राज्यविरुद्ध कसुर र संगठित अपराध कसुरमा थुनामा पठाउने जिल्ला अदालत काठमाडौंको आदेशको बदरको माग गर्दै नेपाली कांग्रेसका नेता समेत रहेका बालकृष्ण खाण, एमालेका नेता समेत रहेका टोपबहादुर रायमाझी, नेपाल सरकारका निलम्बित सचिव टेकनारायण पाण्डले लगायत २० जनाले गएको साउन १२ देखि विभिन्न मितिमा दायर रिट निवेदनमा सुनुवाइ हुने भएको हो । 

हाल खाण, रायमाझी, पाण्डे, रायमाझीका पुत्र सन्दीप, इन्द्रजित राई, आङटावा शेर्पा, सानु भण्डारी, सन्देश शर्मा, टंककुमार गुरुङ, केशव दुलाल, नरेन्द्र केसी लगायत २३ जना थुनामा छन् ।