मुख्यमन्त्री थापाविरुद्धको रिटमा तेस्रो दिनको सुनुवाइ जारी

२१ भदौ, काठमाडौं । कोशी प्रदेशका मुख्यमन्त्री उद्धव थापाले पाएको विश्वासको मत विरुद्ध एमालेका नेता हिक्मतकुमार कार्कीले दायर गराएको रिट  निवेदनमाथि सर्वोच्च अदालतमा तेस्रो दिनको सुनुवाइ सुरु भएको छ ।

सोमबारबाट सुरु भएको सुनुवाइ दोस्रो दिन मंगलबार नसकेपछि आजका लागि हेर्दहेर्दैमा राखेको थियो । बुधबार कृष्ण जन्मष्टमीको सार्वजनिक बिदा भएकाले बिहीबार सुनुवाइ निरन्तर हुने गरी पेशी तोकिएको थियो । 

रिटको सुनुवाइ न्यायाधीश सपना प्रधान मल्ल, कुमार चुँडाल र नहकुल सुवेदीको पूर्ण इजलासमा सुनुवाइ जारी छ । अहिले रिटका विपक्षीका वकिलले बहस गरिहरेका छन् । विपक्षीबाट बहस सकिएपछि रिट निवेदकका वकिलले जवाफी बहस गर्नेछन् । जवाफी बहस सकेमा आजै फैसला आउनेछ ।

कार्कीले मुख्यमन्त्री थापाले भदौ ४ मा प्रदेशसभाबाट लिएको विश्वासको मत असंवैधानिक रहेको भन्दै बदरको माग गर्दै भदौ ६ मा रिट दायर गराएका थिए ।

कार्कीले वर्तमान थापा नेतृत्वकाे वर्तमान सरकार बदर गरी धारा १६८को उपधारा ३ अनुसार प्रदेशसभाको सबैभन्दा ठूलो दल नेकपा (एमाले)को तर्फबाट आफ्नो नेतृत्वमा सरकार गठन गर्ने परमादेश माग गरेका छन् ।