कान्तिबाल अस्पतालमा रेजिशा गाेपालीकाे मृत्यु घटनाबारे संसद बैठकमा स्वास्थ्य मन्त्रीकाे जवाफ माग

२१ भदौ, काठमाडौं । सांसदहरुले उपचार नपाएर कान्ति बाल अस्पतालमा भएको रेजिशा गोपालीको मृत्यु घटनामाथि छानबिन गर्न माग गरेका छन् ।

बिहीबार बसेको प्रतिनिधिसभाको बैठकमा आस्मिक समयमा बोल्दै प्रमुख प्रतिपक्ष नेकपा (एमाले)का सचेतक महेश बर्तौलाले बालिका रेजिशाको मृत्यु घटनाबारे स्वास्थ्यमन्त्री मोहनबहादुर बस्नेतले सदनमा जवाफ दिन माग गरेका छन् । 

बिरामी भएर गम्भीर अवस्थामा काठमाडौंकी ६ वर्षीया रेजिशालाई महारागन्जको कान्तिबाल अस्पतालकाे इमर्जेन्सीमा पुर्याउँदा समेत इमर्जेन्सी कक्षका चिकित्सकले समयमै उपचार नगर्दा बालिकाको ज्यान गएको भन्दै अस्पतालका जिम्मेवार नर्देशकलगायत व्यक्तिहरुलाई कारवाहीको दायरामा ल्याउन सरकारको ध्यानाकर्षण गराए । 

पीडित परिवारलाई क्षतिपूर्ति उप्लध्ब गराउन र घटनाबारे स्वास्थ्यमन्त्रीले सदनमा तत्काल जवाफ दिनुपर्ने भन्दै सभामुखमार्फत ध्यानाकर्षण गराए ।

यस्तै सांसद चन्दा भण्डारीले बालिका रेजिशाको मृत्यु कान्ति बाल अस्पतालको चरम लापरवाहीले ज्यान गएको भन्दै दोषीलाई कारवाहीको माग गरिन् । मृत्यु घटनाबारे तत्काल छानबिन गरेर आगामी दिनमा घटना दोहोरिन नदिने अस्प्ताल प्रशासनमा व्यापक सुधार गर्न गरिन् ।