नेपाली सेनासँग संयुक्त अभ्यास गर्न अमेरिकी वायुसेनाको जहाज नेपाल आइपुग्यो

२१ भदौ, काठमाडौं । नेपाली सेनासँग संयुक्त अभ्यास गर्न अमेरिकी वायुसेनाको जहाज नेपाल आइपुगेको छ । भक्तपुरको नगरकोटमा नेपाली सेनाको टोलीसँग हुने संयुक्त अभ्यासको सिलसिलामा अमेरिकी सेनाको टोली बिहीबार काठमाडौं आइपुगेको हो । 

यही भदौ २४ गतेदेखि असोज १२ गतेसम्म नेपाली सेना र संयुक्त राज्य अमेरिकाको सेनाबीच नियमित रूपमा सञ्चालन हुँदै आएको जोइन्ट कम्बेन्ड एक्सचेन्ज ट्रेनिङको चालिसौं संस्करण सञ्चालन हुँदैछ । साेही तालिमका लागी १२ सदस्यीय टोलीसहित अमेरिकी सेनाकाे जहाज नेपाल आएकाे छ ।

जहाजले अमेरिकी सैनिक तथा तालिमका लागि आवश्यक सामग्री बाेकेर आएको छ । आज नेपाल आएको अमेरिकाको सैनिक विमान शुक्रबार फिर्ता हुने कार्यक्रम रहेको छ । तालिमको मुख्य उद्देश्य विपद्सँग सम्बन्धित सङ्कटका बेला अन्तर्राष्ट्रिय राहत परिचालनमा नेपाली सेनाको भूमिकाबारे अभ्यास गर्ने रहेको छ ।

तालिमका क्रममा नेपाली सेना र अमेरिकी सेनाद्वारा संयुक्त प्याराश्युट अभ्यास गरिनेछ, हेलिकप्टर सपोर्ट सहितको सरल खोज तथा उद्धारसम्बन्धी अभ्यासका साथै मानवीय सहायता लगायतका विषयहरूमा अनुभव तथा ज्ञान आदानप्रदान हुनेछ । तालिममा नेपाली सेनाका ३० जना तथा अमेरिकी सेनाका १२ जना गरी जम्मा ४२ जनाको सहभागिता रहने छ ।