लम्पी स्किन पीडित किसानलाई राहत दिन मापदण्ड बनिसकेको छ : कृषिमन्त्री भुसाल

२१ भदौ, काठमाडौं । सरकारले लम्पी स्किन रोगबाट लाखौं पशु चोपाया बिरामी र हजारौं संख्यामा मरेका घटनामा पीडित किसानलाई क्षतिपूर्ति दिने तयारी  गरेको छ । क्षतिपूर्ति वितरणका लागि मापदण्ड बनाउने काम पूरा भएको कृषिमन्त्री वेदुराम भुसालले जानकारी दिएका छन् । 

बिहीबार बसेको प्रतिनिधिसभाको बैठकमा सांसदहरुसँगको प्रश्नोत्तर कार्यक्रममा यस्तो जानकारी दिएका हुन् । सांसद प्रेम सुवाल, दिलेन्द्र बडु लगायतले मन्त्री भुसाललाई सम्पी स्किन रोगबाट पशु गुमाएका पीडित किसानलाई राहत दिनेबारे सरकारको कार्यक्रमबारे प्रश्न गरेका थिए । 

जवाफमा मन्त्री भुसालले न्युनतम भएपनि पीडित किसानलाई राहत उप्लब्ध गराउने तयारी सरकारले  गरेको र यसबारे मापदण्ड बनाएर सहमतिका लागि गृह र अर्थमन्त्रालयमा प्रस्ताव पठाइसकिएको बताए । 

मापदण्डमा रोगबाट राँगा, भैंसी, गाई, गोरु मरेर क्षति व्यहोरेका किसानलाई न्यूनतम २० हजारबाट राहत दिने व्यवस्था गरिएको बताइएको छ । क्षतिको मूल्यांकनका आधारमा राहत बढ्न सक्ने भएको छ । 

लम्पी स्किन राेगबाट देशमा ८० हजारभन्दा बढी किसानका पशु चाैपाया मरेकाे अनुमान छ । सबैभन्दा गाइ र गाेरू मरेका छन् । ६ लाख संख्यामा संक्रमित भएका छन् ।