सन्दीपविरुद्धको मुद्दामा पीडितको जन्मदर्ता र बसाइसराइ सम्बन्धी थप अभिलेख झिकाउने आदेश

२१ भदौ, काठमाडौं । क्रिकेटर सन्दीप लामिछाने विरुद्धको बलात्कार सम्बन्धी मुद्दामा आज काठमाडौं जिल्ला अदालतमा अन्तिम सुनुवाइ सकिएन ।

न्यायाधीश शकुन्तला कार्कीको इजलासमा बिहीबार वादी पक्षको बहस भएपछि पीडितको जन्म दर्ता र बसाई सराइसम्बन्धी थप केही कागजातहरू माग गर्ने आदेश भएको छ । सन्दीपका वकिलहरूले  बहसका क्रममा पीडित नाबालिग नरहेकाे जिकिर गर्दै पीडितको जन्मदर्ता र बसाइसराइ सम्बन्धी थप अभिलेख ढड्डा झिकाउन माग गरेका थिए ।

अब मुद्दामा सुनुवाई गर्न अर्को पेसी कागजात पेस भएपछि मात्र तोकिने भएको छ । यसअघि साउन ३२ मा अर्कै इजलासमा भएको सुनुवाइपछि पीडित (गौशाला २६) की आमाको जन्मदर्ताको कागजात मगाउने आदेश भएको थियो । उक्त कागज पेस भएपछि आज मुद्दाको अन्तिम टुंगो लगाउन सुनुवाइ हुने भनिएको थियो ।