संघीय शिक्षा र निजामती विधेयक संसद्‌मा पेस गर्ने मन्त्रिपरिषद्को निर्णय

२१ भदौ, काठमाडौं । मन्त्रिपरिषद्को आज बसेको बैठकले संघीय शिक्षा ऐन र संघीय निजामती विधेयक संसद्‌मा पेस गर्ने निर्णय गरेको छ ।

बैठकले ‘संघीय शिक्षा ऐन सम्बन्धी विधेयक, २०८०’ र ‘संघीय निजामती सेवाको गठन, सञ्चालन र सेवाको सर्तसम्बन्धी विधेयक, २०८०’ दफावार छलफलका लागि संघीय संसद्‌मा पेस गर्ने निर्णय गरेको सरकारका प्रवक्ता रेखा शर्माले जानकारी दिइन् ।

मन्त्री शर्माले ‘तेजाब तथा अन्य घातक रासायनिक पदार्थ (नियमन) नियमावली, २०८०’ लाई बैठकले स्वीकृत गरेको बताइन् । साथै स्वास्थ्य क्षेत्रको लैंगिक समानता तथा सामाजिक समावेशीकरण रणनीति, २०८० स्वीकृत गर्ने निर्णय भएको मन्त्री शर्माले बताइन् ।

संघीय शिक्षा ऐन र निजामती ऐन ल्याउन माग गर्दै सरोकारवाहरुले महिनौंदेखि सरकारको ध्यानाकर्षण गराउँदै सडक आन्दोलन समेत गर्दै आएका छन् ।