नक्कली भुटानी शरणार्थी प्रकरणका थुनुवाहरुको रिटमा आज पनि सुनुवाइ भएन

२१ भदौ, काठमाडौं । नक्कली भुटानी शरणार्थी प्रकरणमा सरकारी कीर्ते, ठगी, राज्यविरुद्ध कसुर र संगिठत अपराध मुद्दामा पुर्पक्षका लागि कारागार थुनामा रहेका थुनुवाहरुले उच्च अदालतमा पाटनमा दायर गराएको रिट निवेदनमाथि आज सुनुवाइ हुन सकेन । 

न्यायाधीश सुभास पौडेल र दीपेन्द्रको संयुक्त इजलासमा सुनुवाइका लागि पेसी चढेको थियो । आज थुनुवाहरुको कानून व्यवसायीबाट स्थगित भएको उच्च अदालत प्रशासनले जनाएको छ । केन्द्रीय कारागारमा रहेका नेपाली कांग्रेसका नेता एवं पूर्वगृहमन्त्री बालकृष्ण खाण, एमाले नेता एवं पूर्वउपप्रधानमन्त्री टाेपबहादुर रायमाझी लगायत २० जनाले साउन १२ गने र त्यसपछिका विभिन्न मितिमा रिट निवेदन दायर गराएका थिए । 

रिटमा उनीहरुले आफूहरुलाई मुद्दा पुर्पक्षका जेल चलान गर्ने काठमाडौं जिल्ला अदालतको निर्णय बदरको माग गरेका छन् । सुनवाइका लागि यसअघि पनि पटकपटक पेसी चढेपन रोकिँदै आएको थियो ।