बारा सुनचाँदी व्यवसायी संघका अध्यक्ष शिवकुमार सरार्फ पक्राउ

२२ भदौ, काठमाडौं । प्रहरीले सुन तस्करी प्रकरणमा थप एकजना पक्राउ गरेको छ । बाराका शिव कुमार सरार्फलाई प्रहरीले पक्राउ गरेको हो । उनी बारा जिल्ला सुनचाँदी व्यवसायी संघका अध्यक्ष हुन् । उनीसँगै त्रिभुवन विमानस्थल भन्सारबाट बाहिरिएको ६१ किलो सुन प्रकरणमा पक्राउ पर्नेहरुको संख्या २७ पुगेको छ ।

त्रिभुवन विमानस्थलबाट बरामद सुन तस्करीमा उनको पनि संलग्नता भेटिएको पाइएपछि बिहीबार बेलुका पक्राउ गरिएको हो । पक्राउ परेका सरार्फलाई सीआइबीको नियन्त्रणमा राखिएको र आजै म्याद थपका लागि अदालत उपस्थित गराइने भएको छ ।   

बारा घर भएका सरार्फलाई पक्राउ गरिएको  ब्यूरोले जनाएको छ । राजस्व अनुसन्धान विभागले त्रिभुवन अन्तर्राष्ट्रिय विमानस्थलबाट साउन ३ मा बरामद गरेको सुनको तस्करी गरेको आरोपमा हालसम्म पक्राउ पर्नेको संख्या २७ पुगेको छ । राजस्वले सुन तस्करीबारे अनुसन्धान गर्न साउन २१ मा सीआईबीलाई जिम्मेवारी हस्तान्तरण गरेको थियो ।

ब्रेक सु भनेर तस्करी गरिएको सुन प्रकरणमा चिनियाँ व्यापारी र उनीहरूसँग साँठगाँठ भएका नेपालीहरूलाई पक्राउ गरी प्रहरीले अनुसन्धान जारी राखेको छ । यो प्रकरणमा पूर्व सभामुख कृष्णबहादुर महराका छोरा राहुल पक्राउ परेका छन् भने पूर्व उपराष्ट्रपति नन्दबहादुर पुन पासाङका छोरा दिपेशसँग पनि प्रहरीले बयान लिएको थियो ।