कोरियामा मौसमी कामदार पठाउने सम्झौता भएको हल्ला निराधार : श्रम मन्त्रालय

२२ काठमाडौं । श्रम, रोजगार तथा सामाजिक सुरक्षा मन्त्रालयले दक्षिण कोरियासँग मौसमी कामदार पठाउने कुनैपनि सम्झौता नभएको स्पष्ट पारेको छ ।

मौसमी कामदार पठाउने सूचना सामाजिक संजालमा व्यापक भएपछि मन्त्रालयले यसको खण्डन गर्दै नक्कली सूचनाको भ्रममा नपर्न सबैसँग आग्रह गरेको छ । मन्त्रालयले नेपालबाट हालसम्म कोरियाका लागि कोरिया रोजगार अनुमति प्रणाली (ईपीएस)मार्फत मात्र कामदार पठाउने व्यवस्था रहेको समेत प्रष्ट पारेको छ । 

श्रम प्रवक्ता डण्डुराज घिमिरेको हस्ताक्षरसहितको मौसमी कामदार लैजाने प्रक्रिया सुरु भएको भन्दै नक्कली सूचना सामाजिक सञ्जालमा भेटिएपछि श्रम मन्त्रालयले त्यस्ता नक्कली सूचना निकाल्ने पक्षको खोजी भइरहेको जनाइएको छ । उक्त नक्कली सूचनामा कार्तिक २२ सम्ममा १२ हजार नेपाली कामदार पठाउन कोरियासँग सम्झौता भएको उल्लेख छ । जसको भ्रममा परेर धेरै व्यक्तिले मन्त्रालयमा समेत सम्पर्क गर्ने क्रम बढेको थियो ।

क्रम नरोकिएपछि मन्त्रालयले बिहीबार एक प्रेस विज्ञप्ति जारी गरेर भ्रमणमा नपर्न सचेत गराएको हो । ‘‘आधिकारिक निकायको अनुमतिबिना सामाजिक सञ्जालमा वैदेशिक रोजगारसम्बन्धी विषयमा प्रचारप्रसार गरी सर्वसाधारणमा भ्रम सिर्जना नगर्नसमेत सम्बन्धित सबैमा श्रम, रोजगार तथा सामाजिक सुरक्षा मन्त्रालय जानकारी गराउँछ’ विज्ञिप्तिमा भनिएको छ ।